İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 253 Hüküm no: 222 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Osman b. Mustafa’nın vârisleri, Ömer b. Ali b. Mustafa, Ahmed Ağa b. Mehmed ve Fâtıma bt. Mehmed’in bedel-i sulh karşılığında anlaştıkları Mahmiye-i İstanbul’da Ebâ Eyyûb-i Ensârî kapısı dâhilinde Koca Mustafa Paşa mahallesi ahâlîsinden olup barutçu tâ’ifesinden iken İslâm ile müşerref olan Ahmed b. Abdullah nâm kimesne meclis-i şer‘-i şerîfden, tâ’ife-i mezbûrdan olup kendi tarafından asîl ve Mıgırdiç nâm zimmî tarafından husûs-ı âti’l-beyâna vekîl olduğu Kayzar v. Serkis ve Kirador v. Krikor nâm zimmîler şehâdetleri ile şer‘an sâbit olan Bogos v. Krikor hâlâ medîne-i Edirne’de nâibü’ş-şer‘i’ş-şerîf Mehmed Efendi b. Mustafa b. Veli tarafından hat ve hatmini hâvî ve târih-i kitâb senesi Muharremü’l-harâmı’nın yirmi dokuzuncu günü ile müverrah nakl-i şer‘î vârid olup mazmûnu fi’l-asl vilâyet-i Anadolu’da kasaba-i Divriği sâkinlerinden olup hâlâ başbâkīkulu Mehmed Ağa’nın hizmetinde olan nâkil-i kitâb Ömer b. Ali b. Mustafa nâm kimesneden vech-i âtî üzre da‘vâ-yı sahîh-i şer‘iyye ile [me]sbûk işhâd-ı şer‘î sudûrundan sonra udûl-ı ahrâr-ı ricâlden olup kasaba-i mezbûrda Kaya mahallesinde olup hâlâ mahmiye-i Edirne’de müsâfere vechi üzre sâkin olan Ahmed b. Mehmed b. Ali ve yine kasaba-i mezbûrede Debbâğhâne mahallesinde olup mahmiye-i Edirne’de misâfir olan el-Hâc Ali b. Ahmed b. Şaban nâm kimesne bu nakl ve tahvîl için mahall-i cerh ve ta‘dîle hâzırân olup her biri şöyle edâ-i şehâdet-i şer‘iyye eylediler ki mine’l-asl kasaba-i mezbûrede Mercan Tepesi mahallesi sâkinelerinden olup bundan akdem mahrûse-i İstanbul’da ...? kurbunda sâkine iken ondan akdem fevt [olan] Emine bt. Osman b. Mustafa nâm hâtunun babası mezbûr Osman ile müşterî-i mezbûr Ömer’in babası mezbûr Ali li ebeveyn karındaşları olup babaları ismi mezbûr Mustafa [55b] ve dedeleri ismi merkūm Nu[r]i ve anaları ismi Ayşe ve maskat-ı re’sleri kasaba-i mezbûre Kaya mahallesidir. Müteveffât-ı mezbûrenin verâseti usûbet-i nesebiyye cihetinden müsteşhid-i mezbûra münhasıradır bundan gayrı vârisi ve terekesine müstahakk-ı âhar olduğu mâ‘lûmumuz değildir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olduğunu hâvî olunmağın kitâb-ı mezbûr nâkil-i mezbûr Ömer’in taleb ve da‘vâsıyla müteveffât-ı mezbûre Emine’nin zevci olup terekesine vâzı‘ü’l-yed olan Ahmed Ağa b. Mehmed nâm kimesne ile li üm er karındaşı kızı olup zevcim cihetinden vârisesi olmak üzre kezâlik müteveffât-ı mezbûre terekesine vâzı‘atü’l-yed olan Fâtıma bt. Mehmed tarafından husûs-ı âti’l-beyâna vekîlleri olduğu mezbûre Fâtıma’nın vârisini ma‘rifet-i şer‘iyye ile ârifân Mehmed b. Ali ve Ali b. Ömer nâm kimesneler ve şehâdetleri ile şer‘an sâbit Hasan Bey b. Ali nâm kimesneler mahzarında feth ve kırâ’at ve istintâk olundukda mezbûr Hasan Bey dahi müvekkilleri mezbûrân Ahmed Ağa ve Fâtıma müteveffât-ı mezbûrenin terekesine vâzı‘ü’l-yed oldukları ikrâr, lâkin kitâ[b]-ı mezbûrun hâlâ medîne-i Edirne’de nâibü’ş-şer‘i’ş-şerîf olan merkūm Mehmed Efendi tarafından vürûdunu inkâr etmeğin müdde‘î-i mezbûrdan kitâb-ı mezkûr hâlâ medîne-i Edirne’de nâibü’ş-şer‘i’ş-şerîf olan Mehmed Efendi tarafından vârid olup zeylinde olan hat ve hatim merkūm Mehmed Efendi’nin hat ve hatmi olduğuna beyyine taleb olundukda kitâb-ı mezkûrun zeylinde isimleri mastûr olup yol şâhidleri olan mahmiye-i İstanbul’da misâfiren Evliyâ Efendi odalarında sâkin Kasım Halîfe b. Mehmed b. Kasım ve İmâm Ali odalarında sâkin Ali b. İbrahim b. Sultan nâm kimesneler li ecli’ş-şehâde meclis-i şer‘a hâzırân olup işhâd olunduklarında fi’l-hakīka hâlâ medîne-i Edirne’de nâibü’ş-şer‘i’ş-şerîf olan Mehmed Efendi b. Mustafa [b.] Veli kitâb-ı mezkûru bizim üzerimize kırâ’at ve isimlerimizi zeyline tahrîr ve huzûrumuzda imzâ ve mühürleyip hat ve hatmine bizi işhâd etmiş idi biz kitâb-ı mezbûrun zeylinde olan hat ve hatim hâlâ medîne-i Edirne’de nâibü’ş-şer‘ merkūm Mehmed Efendi’nin hat ve hatmi olduğuna şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince ba‘de’l-hükmi’ş-şer‘ müdde‘î-i mezbûr Ömer meclis-i şer‘-i şerîfde vekîl-i merkūm Hasan Bey mahzarında ikrâr ve takrîr-i kelâm edip müteveffât-ı mezbûrenin terekesinden hisse-i şer‘iyyemi vâzı‘âni’l-yed olan mezbûrân Ahmed Ağa ve Fâtıma Hâtun’dan taleb ve da‘vâ ettiğimde beynimizde nizâ‘-ı küllî vukū‘undan sonra muslihûn tavassut edip mezbûrân Ahmed Ağa ve Fâtıma Hâtun ile beynimizde altı yüz elli guruş inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr altı yüz elli guruşu yedlerinden ahz u kabz ettiğimden sonra müteveffâ[t]-ı mezbûrenin terekesine müte‘allika âmme-i de‘âvâtdan mezbûrân Ahmed Ağa ve Fâtıma Hâtun’un zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: Çorbacı Mehmed Ağa b. Ahmed, Hasan Efendi el-Müezzin, el-Hâc İsmail b. Hüseyin, el-Hâc Mustafa b. Ali, Receb b. Abdullah el-Bevvâb, Rasül Efendi el-İmâm, Sâlih Çelebi b. Mustafa, Mustafa b. Hasan, Ali b. Mustafa, el-Hâc Mustafa b. ( ) ve gayruhüm.