İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 255 Hüküm no: 223 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kastamonu’nun Ahlatcık köyü müsellemi Ali Ağa b. Abdullah ile kethüdâsı Ali Ağa’nın köy halkından haksız yere aldıkları para hususunda tarafların sulh oldukları Husûs-ı âti’l-beyânın mahallinde tahrîri iltimâs olunmağın kıbel-i şerî‘at-i mergūbeden irsâl olunan Mevlânâ Şeyh Mehmed Efendi Mustafa Efendi b. el-Hâc Halil’in mahmiye-i İstanbul’da Mimar Sinan mahallesinde vâki‘ menziline varıp zeyl-i vesîkada muharrerü’l-esâmî olan müslimîn huzûrunda akd-i meclis-i şer‘-i âlî eyledikde vilâyet-i Anadolu’da Kastamonu kazâsına tâbi‘ Ahlatacık nâm karye sükkânından Müezzin Hüseyin Halîfe b. Hasan nâm kimesne kendi tarafından asâleten ve li ebeveyn karındaşı Mehmed nâm kimesne tarafından husûs-ı âti’l-beyâna vekîl olduğu Mustafa Bey b. Mehmed ve Mehmed Beşe b. el-Hâc Rıdvan nâm kimesneler şehâdetleri ile şer‘an sâbit olmağla vekâleten meclis-i ma‘kūd-ı mezbûrda [56a] sâbıkan kazâ-i mezkûr mütesellimi olan Ali Ağa b. Abdullah’ın kethüdâsı olan bâ‘is-i hâze’l-kitâb diğer Ali Ağa b. Mehmed nâm kimesne mahzarında ikrâr ve takrîr-i kelâm edip mezbûr Ali Ağa kazâ-i mezbûr mütesellimi iken kethüdâsı merkūm diğer Ali Ağa târih-i kitâbdan on beş ay mukaddem senin karındaşın mezbûr Mehmed karye-i mezbûrda sâkine Ayşe nâm hâtunu darb etmekle mezbûre Ayşe iskāt-ı cenîn etmiş deyû karındaşım müvekkil-i mezbûr ile benim elli beş esedî guruşumuzu ve karye-i mezbûre ahâlîsinden dahi yetmiş bir esedî guruşu bi gayri hakkın ahz u kabz etmeğin karındaşım mezbûr Mehmed ile benden ber vech-i muharrer fuzûlen ahz u kabz eylediği meblağ-ı mezbûr elli beş esedî guruş merkūm diğer Ali Ağa’dan asâleten ve vekâleten da‘vâ ve taleb eylediğimde, ol dahi inkâr etmeğin beynimizde nizâ‘ vukū‘undan sonra muslihûn tavassut edip merkūm diğer Ali Ağa ile dokuz buçuk esedî guruş üzerine beynimizde inşâ-i akd-i sulh eylediklerinde ben dahi asâleten ve vekâleten sulh-i mezbûru kabûl ve bedel-i sulh olan meblağ-ı mezbûr dokuz buçuk esedî guruşundan ve husûs-ı mezbûra müte‘allika âmme-i de‘âvî ve mütâlebâtdan mütesellim-i mezbûr Ali Ağa ile kethüdâsı olan merkūm diğer Ali Ağa’nın zimmetlerini asâleten ve vekâleten ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î karye-i mezbûre ahâlîsi taraflarından dahi kezâlik husûs-ı câ’i’l-beyâna vekîl olduğu mezbûrân Mustafa Bey ve Mehmed’in şehâdetleri ile şer‘an sâbit olan Mehmed b. Mahmud nâm kimesne meclis-i mezkûrda, merkūm diğer Ali Ağa muvâcehesinde bi’l-vekâle ikrâr ve takrîr-i kelâm [edip] ben dahi merkūm diğer Ali Ağa’nın vech-i muharrer üzre karye-i mezbûre ahâlîsinden bi gayri hakkın ahz u kabz eylediği meblağ-ı mezbûr yetmiş bir esedî guruşu vekâlet-i mahkiyem hasebiyle kethüdâ-yı mezkûr Ali Ağa’dan da‘vâ ve taleb eylediğimde, ol dahi inkâr etmekle muslihûn tavassut edip dört esedî guruş üzerine beynimizde inşâ-i akd-i sulh eylediklerinde ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûr dört esedî guruşu mezbûr diğer Ali Ağa yedinden tamâmen ahz u kabz edip bâkī altmış yedi esedî guruşdan ve husûs-ı mezbûra müte‘allika cemî‘ de‘âvî ve muhâsamâtdan mezbûr diğer Ali Ağa ile mütesellim-i mezkûr Ali Ağa’nın zimmetlerini bi’l-vekâle ibrâ-i âmm-ı dâfi‘ü’l-hisâm ile ibrâ ve iskāt eyledim dedikde isre’t-tasdîki’l-mer‘î husûs-ı mezkûru Mevlânâ-yı mezbûr mahallinde tahrîr ve ma‘an ba‘s olunan Hüseyin b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mustafa Efendi b. İbrahim, Hüseyin Efendi b. el-Hâc İbrahim, Mehmed Ağa b. Abdülkādir, İbrahim Efendi b. Ahmed, Musa Efendi b. Şaban, Mustafa Efendi b. el-Hâc Mehmed Ağa, Hüseyin Çavuş el-Mübâşir, Hüseyin b. Abdullah ve gayruhüm mine’l-hâzırîn.