İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 256 Hüküm no: 224 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Mustafa’nın vârisleri Mehmed Efendi b. Mehmed ile Ayşe ve Kâmile arasındaki veraset davasının sulhla sonuçlandığı Mahmiye-i İstanbul’da Cebecibaşı mahallesinde sâkin Mehmed Efendi b. Mehmed nâm kimesne meclis-i şer‘-i şerîf-i enverde vilâyet-i Anadolu’da Beypazarı kasabası sâkinelerinden bâ‘isetü hâze’l-vesîka Ayşe ve Kâmile bt. Hüseyin Bey nâm hâtunlar taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân Mustafa Beşe b. Ahmed ve Osman Çavuş b. Pîr Ömer nâm kimesneler şehâdetleri ile şer‘an sâbit olan el-Hâc İslâm b. Ebûbekir nâm kimesne mahzarında ikrâr ve takrîr-i kelâm edip kasaba-i mezbûrda sâkin iken bundan akdem vefât eden Ali Ağa b. Mustafa’nın ben li ebeveyn ammi oğlu ve usûbet-i nesebiyye cihetinden hasren vârisi iken müvekkiletân-ı mezbûretân Ayşe ve Kâmile müteveffâ-yı mezbûrun li ebeveyn halaları olmağla vâriseleri olmak zu‘muyla ber mûceb-i defter-i kassâm, müteveffâ-yı mezbûrun terekesinden bin guruşluk esbâbını kabz etmeleri ile ben dahi müteveffâ-yı mezbûrun dâyinleri? olan Kırlı oğlu Halil Beşe ve mezbûr el-Hâc İslâm ve Karabaş el-Hâc Mehmed ve diğer Mehmed Çelebi’yi meblağ-ı mezbûr bin guruşun altı yüz iki guruşunu mezbûretân Ayşe ve Kâmile üzerlerine rızâları ile havâle edip anlar dahi mezbûrûn ile havâle-i mezbûreyi kabûl edip ve dört yüz guruşunu mezbûretân Ayşe ve Kâmile’den bundan akdem da‘vâ ve taleb eylediğimde anlar dahi meblağ-ı bâkī-i mezbûru bana edâdan imtinâ‘ etmeleri ile beynimizde nizâ‘-ı küllî vukū‘undan sonra muslihûn tavassut edip mezbûretân Kâmile ve Ayşe ile beynimizde on esedî guruş ve meclis-i sulhde mevcûd bir re’s doru kısrak ve iki köhne mak‘ad ve bir köhne seccâde üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr on esedî guruş ile mârrü’z-zikr kızıl kısrak ve mak‘ad ve seccâdeyi mezbûretân Ayşe ve Kâmile’nin yedlerinden ahz u kabz eylediğimden sonra müteveffâ-yı mezbûrun kalîl ve kesîr terekesine müte‘allika cemî‘ de‘âvî ve mütâlebâtdan mezbûretân Ayşe ve Kâmile’nin zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyledim dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Eş-Şeyh Bâli Efendi, Kar[a]baş el-Hâc Mehmed Çelebi, İmâm Efendi b. ( ), Kırlı zâde b. Halil Beşe, Mehmed Beşe b. ( ), Hüseyin Efendi b. Hasan, Fahrü’l-kuzât Halil Efendi b. Mehmed, Hüseyin Çelebi b. el-Hâ[c] Resûl, Hasan b. Hüseyin ve gayruhüm mine’l-hâzırîn.