İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 257 Hüküm no: 225 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana bt. Apostol ile Aleksandri v. Zafiri’nin boşandıkları Mahmiye-i İstanbul’da el-Hâc Hüseyin mahallesinde sâkin olup zâtı Manol v. Tanaş ve Yamandi v. Zafiri nâm zimmîler ta‘rîfleri ile mu‘arrefe olan Sultana bt. Apostol nâm Nasrâniyye meclis-i şer‘-i hatîr-i lâzımü’t-tevkīrde zevc-i muhâlı‘ı işbu bâ‘isü’s-sifr Aleksandri v. Zafiri nâm zimmî mahzarında ikrâr-ı tâm ve takrîr-i kelâm edip zevcim mezbûr Aleksandri zimmetinde mütekarrir ve ma‘kūdun-aleyh olan beş yüz akçe mehr-i müeccelim üzerine ve nafaka iddet-i ma‘lûmem ve me’ûnet-i süknâm dahi kendi üzerime olmak üzre zevcim mezbûr Aleksandri ile muhâla‘a-i sahîha-i şer‘iyye ile muhâla‘a eylediğimde, ol dahi hul‘-i mezbûru kabûl eylediğinden sonra hukūk-ı zevciyyete müte‘allika cemî‘ de‘âvî ve eymân-ı muhâsamâtdan her birimiz âharın zimmetini ibrâ-i âmm-ı kātı‘ü’l-hısâm ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Kethüdâ b. Abdullah, el-Hâc Mustafa el-Muhzır, Ali b. Abdullah, İbrahim Çelebi b. Mehmed ve gayruhüm mine’l-hâzırîn.