İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 260 Hüküm no: 229 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ramazan ile Mehmed Dede b. Mahmud’un boşandıkları Mahmiye-i İstanbul’da Hoca Ali mahallesi sâkinelerinden Ayşe bt. Ramazan nâm hâtun zâtı ma‘rifet-i şer‘iyye ile ârifân Mehmed Çelebi b. Ahmed ve Halil b. İbrahim nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde zevc-i dâhili bâ‘is-i hâze’l-kitâb Mehmed Dede b. Mahmud nâm kimesne mahzarında ikrâr ve takrîr-i kelâm edip zevc-i mezbûr Mehmed Dede zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Mehmed Dede ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Abdullah b. Veli, Mustafa b. Ramazan, İbrahim Çelebi b. Ahmed, Ebûbekir b. Hüseyin, Mehmed b. Mehmed ve gayruhüm.