İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 260 Hüküm no: 230 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan, Receb, Ramazan ve Mehmed adlı at tacirlerinin Kirakos v. Kazar’dan satın aldıkları atlar dolayısıyla borçları olduğu Mahmiye-i İstanbul’da Davud Paşa mahallesi sâkinlerinden bâ‘is-i hâze’r-rakīm Kirakos v. Kazar nâm zimmî meclis-i şer‘-i şerîfde mahmiye-i mezbûrda Ebâ Eyyûb-i Ensârî kapısı dâhilinde Koca Mustafa Paşa mahallesi sâkinlerinden olup canbâz tâ’ifesinden şerîkler olan Hasan b. Mehmed ve Receb b. Abdullah ve Ramazan b. Yusuf ve Mehmed b. Hızır nâm kimesneler mahzarlarında üzerlerine da‘vâ ve takrîr-i kelâm edip mezbûrûn Hasan ve Receb ve Ramazan ve Mehmed zimmetlerinde yedinden iştirâ ve kabz ettikleri altı re’s bârgir bahâlarından yüz otuz iki esedî guruş hakkım olmağla mezbûruna suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûrûn Hasan ve Receb ve Ramazan ve Mehmed cevâblarında, kaziyye minvâl-i muharrer üzre olup zikr olunan altı re’s bârgir bahâlarından zimmetlerinde müdde‘î-i mezbûr Kirakos’a vâcibü’l-edâ ve lâzımü’l-kazâ yüz otuz iki guruş deynleri olduğunu her biri ikrâr ve i‘tirâf etmeğin alâ mûceb-i i‘tirâfihim meblağ-ı mezbûr yüz otuz iki guruşu müdde‘î-i mezbûra edâ ve teslîme mezbûrûna tenbîh olunmağın mâ vaka‘a bi’t-taleb ketb olundu. Fi’l-yevmi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: İbrahim Çelebi b. Mehmed, Mahmud Çelebi b. ( ) Du‘âcı, Osman b. Ömer, Ebûbekir b. Hüseyin, Musa Halîfe b. Receb.