İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 261 Hüküm no: 231 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Yusuf Beşe b. Ali’nin bölüğe ait paradan Mehmed b. Davud’a emanet verdiği meblağı geri istediği Dergâh-ı âlî -dâme merci‘an li’l-e‘âlî-yeniçerilerinden elli üçüncü bölüğü mahsûs oda mühimmâtı için mevkūfe nukūdun hâlâ mütevellîsi olan bâ‘is-i hâze’l-kitâb Yusuf Beşe b. Ali nâm kimesne meclis-i şer‘-i şerîfde Terkos nâhiyesine? tâbi‘ Azadlı nâm karye ahâlîsinden Mehmed b. Davud? nâm kimesne mahzarında üzerlerine da‘vâ ve takrîr-i kelâm edip yedimde olan mâl-ı vakf-ı mezbûrdan yüz on beş esedî guruşu bin seksen senesi Şevvâli’n evâsıtında mezbûr Mehmed’e emânet ve teslîm ol dahi yedimden istidâne ve tesellüm ve kabzetmiş idi hâlâ mezbûr Mehmed’e suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl merkūm Mehmed cevâbında kaziyye minvâl-i muharrer üzre olduğu bi tav‘ihî ikrâr ve i‘tirâf etmeğin mûcebince meblağ-ı mezbûr yüz on beş esedî guruşu müdde‘î-i mez[bûr] Yusuf Beşe’ye edâ ve teslîme mezbûr Mehmed’e tenbîh olunmağın mâ vaka‘a bi’t-taleb ketb olundu. Fi’s-sâmin min aşer min Saferi’l-hayr li sene seb‘a ve semânîn ve elf. Şuhûdü’l-hâl: Solak Ali Çelebi, İbrahim Beşe el-Mübâşir, el-Hâc Hasan b. ( ), Osman Beşe b. ( ) ve gayruhüm mine’l-hâzırîn.