İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 266 Hüküm no: 238 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır Beşe b. el-Fettâh’ın evini Mehmed Beşe b. Mustafa’ya sattığı Mahmiye-i İstanbul’da Hüsre[v] Paşa türbesi kurbunda Kazasker Mehmed Efendi mahallesi sâkinlerinden Hızır Beşe b. el-Fettâh nâm kimesne meclis-i şer‘-i şerîfde bâ‘is-i hâze’l-kitâb Mehmed Beşe b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Fâtıma Hanım mülkü ve bir tarafdan Kâtib Mustafa Efendi mülkü ve bir tarafdan Hatice bt. Mehmed nâm hâtun mülkü ve bir tarafdan tarîk-i hâs ile mahdûd fevkānî iki bâb oda ve bir sofa ve iki kenîf ve bir su kuyusu ve bir mikdâr bahçeyi müştemil menzilimi, cümle tevâbi‘i ve levâhıkı ve kâffe-i hukūk ve merâfıkı ile mezbûr Mehmed Beşe’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz on esedî guruşa bey‘ ve teslîm ol dahi iştirâ ve tesellüm ve kabz ettiğinden sonra semeni olan meblağ-ı mezbûr üç yüz on esedî guruşu yedinden tamâmen ahz u kabz eyledim. Min ba‘d menzil-i mahdûd-ı mezbûr merkūm Mehmed Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mustafa Efendi b. el-Hâc Mehmed el-İmâm, Mehmed Efendi b. Yusuf, Abdullah Çelebi b. Ahmed el-Müezzin, Hamza Ağa b. Ali, Sâlih Çelebi b. el-Hâc Mehmed, Ahmed Çelebi b. Mehmed el-Müezzin, bölükçü Ahmed Çelebi b. Osman, İbrahim Çelebi b. Ahmed, Mehmed Çelebi b. İsmail ve gayruhüm.