İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 271 Hüküm no: 244 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Rumeli Kazaskeri Abdurrahmanzâde Mehmed Efendi’nin Büyükçekmece’deki çiftliğinin ve diğer mallarının Hüseyin Ağa b. İsmail’e satıldığı Sâbıkan Rumeli kazaskeri iken medîne-i Selânik’de bâ takdîr-i Yezdânî vedâ‘-ı âlem-i fânî eden merhûm Abdurrahmanzâde Mehmed Efendi’nin necl-i necîbleri mefharü’l-mehâdîmü’l-kirâm Ahmed Efendi tarafından husûs-ı âti’l-beyâna vekîl olduğu Osman Bey b. Receb ve Yusuf Bey b. Abdullah nâm kimesneler şehâdetleri ile şer‘an sâbit olan Osman Efendi b. Mehmed nâm kimesne meclis-i şer‘-i şerîfde kendi tarafından asîl ve zevcesi fahrü’l-muhadderât Râbia bt. Abdullah nâm hâtun tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Mahmud Çelebi b. Fazl ve İbrahim Çelebi b. İsmail nâm kimesneler şehâdetleri ile şer‘an sâbit olan mefharü’l-emâcid ve’l-ekârim sâhib-i hâze’l-kitâb Hüseyin Ağa b. İsmail mahzarında ikrâr ve takrîr-i kelâm edip müvekkilim mûmâ-ileyh Ahmed Efendi yedinde mülkü olup Havâss-ı Aliyye kazâsı müzâfâtından Büyükçekmece nâhiyesine tâbi‘ Perascık nâm karyede vâki‘ Emir Paşa çiftliği demekle ma‘rûf tahdîd ve tavsîfden müstağnî muhavvateyn[i] muhtevî, muhavvata-i hâriciyyesinde iki bâb fevkānî oda ve iki sofa ve bir kenîf ve bir kebîr ahır ve muhavvata-i dâhiliyyesinde dört bâb fevkānî oda ve iki sofa ve câmekânlı bir hamam ve bir matbah ve bir fırın ve üç anbar ve Mehmed Ağa çiftliği ile müşterek mâ-i cârîyi müştemil çiftlik ta‘bîr olunur menzili ve menzil-i mezbûr hizâsında vâki‘ bir köşk ve bir havuz ve bir tahtânî odayı müştemil bahçeyi ve kurbunda vâki‘ bir kıt‘a bağı ve bir kıt‘a bağ yerini ve etrâf-ı erba‘ası taş duvarlı arsayı, cümle tevâbi‘ ve levâhıkları ve kâffe-i hukūk ve merâfıkları ile ve menzil-i mezkûr içinde dört çift kara sığır öküzü ve bir çift su sığırı ve öküzü ve bir re’s kara sığır ineği ve üç minder ve bir keçe ve bir kaliçe ve üç çift çuval ve bir tencere ve on iki yastık ve iki sahan ve sekiz yorganı ve sâir beynimizde ma‘lûm çiftlik âlâtını ve zikri âtî tarlalarda nâibine salâhı zâhir olan mezrû‘âtı, bi safkatin vâhidetin mûmâ-ileyh Hüseyin Ağa’ya bin dört yüz elli esedî guruşa bey‘ ve çiftlik-i mezbûr ile ma‘an tasarruf olunup taht-ı tasarrufunda olan mâ‘lûmü’l-hudûd ve ma‘dûdü’l-kıt‘a tarlalar ve çayırları yüz esedî guruş bedel mukābelesinde ma‘rifet-i sâhib-i arz ile ferâğ ve tevfîz, mûmâ-ileyh Hüseyin Ağa dahi müvekkilesi merkūme Râbia Hâtun ile beynlerinde müşterek olmak üzre asâleten ve vekâleten iştirâ ve tefevvüz ve kabûl ettiğinden sonra semen-i mezbûr bin dört yüz elli guruşu ve bedel-i merkūm yüz guruşu, cem‘an bin beş yüz elli guruşu müvekkilim mûmâ-ileyh Ahmed Efendi’ye tamâmen edâ ve teslîm ol dahi ahz u kabz edip ve zikr olunan çiftliği ve bahçeyi ve bağı ve arsayı ve eşyâ-i mezkûre ve devâb-ı merkūmeyi ve tarlalar ve çayırları mahallinde zabt ve tasarrufa mûmâ-ileyh Hüseyin Ağa’yı taslît eyledi dedikde gıbbe’t-tasdîki’ş-şer‘î ve’t-tahkīki’l-mer‘î, mâ vaka‘a bi’t-taleb ketb olundu. Fi’l-yevmi’r-râbi‘ min Saferi’l-hayr li sene seb‘a ve semânîn ve elf. Şuhûdü’l-hâl: Mustafa Efendi b. İbrahim el-İmâm, Abdi b. İslâm, İshak b. Ahmed, Abdi Beşe b. Mustafa, Yusuf b. Abdullah, Mehmed b. Ahmed, Mustafa Beşe b. Abdullah, Abdullah Çelebi b. Ahmed Efendi.