İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 275 Hüküm no: 250 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa Paşa’nın Üsküp’deki vakfa ait evinin tasarrufunu ve tevliyetini Abdülkadir Çelebi b. Muhyiddin’e bıraktığı Husûs-ı âti’l-beyânın mahallinde tahrîr iltimâs olunmağın savb-ı şer‘-i şerîfden irsâl olunan Mevlânâ Abdurrahman Efendi b. Hüseyin hâlâ mesned-nişîn-i sadr-ı Anadolu olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî alîmü’l-ilm menârü’l-fazl ve’t-tükā sa‘âdetlü Mustafa Efendi hazretlerinin Dârü’l-hilâfeti’l-aliyye Kostantıniyye el-mahmiye Tevkī‘î Cafer Çelebi mahallesinde vâki‘ sa‘âdet-hânelerine varıp zeyl-i sahîfede muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mahmiye-i mezbûrede Tercüman Yunus mahallesi sâkinelerinden mefharü’l-muhadderât zübdetü’l-muvakkarât Fâtıma Hanım bt. el-merhûm Mustafa Paşa tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân zikr olunan Tevkī‘î Cafer Çelebi b. el-merhûm Ali Efendi meclis-i ma‘kūd-ı merkūmda, vilâyet-i Rumeli’nde medîne-i Üsküp ahâlîsinden sâhib-i hâze’l-kitâb fahrü’l-akrân Abdülkādir Çelebi b. Muhyiddin mahzarında ikrâr ve takrîr-i kelâm edip merhûm Abdülkādir Efendi evkāfından olup medîne-i mezbûre kurbunda vâki‘ lede’l-ahâlî ve’l-cîrân ma‘lûmü’l-hudûd çiftlik ta‘bîr olunur büyût-ı adîde ve ahır ve anbarı müştemil tasarrufu ve tevliyyeti evlâd-ı vâkıfdan olmağla menzilin müvekkilem mûmâ-ileyhâ Fâtıma Hanım’ın meşrûtası olmağın hâlâ müvekkile-i mûmâ-ileyhâ Fâtıma Hanım menzil-i mezbûrun tasarruf ve tevliyyetinden kasr-ı yed edip evlâd-ı vâkıfdan olup kendinden sonra ber mûceb-i şart-ı vâkıf menzil-i mezbûrun meşrûtun-lehi olan merkūm Abdülkādir Çelebi’ye fâriğa olup mahallinde zabt ve tasarrufa merkūm Abdülkādir Çelebi’yi taslît eyledi dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr edip ma‘an irsâl olunan Durmuş Beşe b. Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fî selh-i Saferi’l-hayr li sene seb‘a ve semânîn ve elf. Şuhûd[ü’l-hâl]: Mefharü’l-müderrisînü’l-kirâm Müezzinzâde Mehmed Efendi, mefharü’l-mevâli’l-izâm Abdullah Efendi eş-şehîr Uşşâkīzâde, fahrü’l-eimmeti’l-kirâm es-Seyyid Abdülaziz Efendi, mefharü’l-kuzâti’l-müteşerri‘în el-Hâc Ahmed b. Ali, Mehmed Efendi b. Habib, el-Hâc Mehmed b. İdris, el-Hâc Halil b. el-Hâc Ali.