İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 276 Hüküm no: 251 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bosnalı Mahmud b. Ali’nin vârisleri Latife b. Abdullah ile Hasan arasında veraset hisseleri konusunda anlaşmaya varıldığı Mahmiye-i İstanbul’da Yavaşça Şâhin Ağa mahallesinde sâkin iken bundan akdem vefât eden Bosnevî el-Hâc Mahmud b. el-Hâc Ali nâm kimesnenin verâseti, zevce-i metrûkesi Latife bt. Abdullah nâm hâtun ile li ebeveyn karındaşı el-Hâc Hasan nâm kimesneye münhasır ve tashîh-i mes’elesi dört sehimden olup sihâm-ı mezbûreden bir sehmi mezbûre Latife Hâtun’a ve üç sehmi mezbûr el-Hâc Hasan’a isâbet ettiği şer‘an mütehakkik oldukdan sonra mezbûre Latife Hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân hâlâ zevci olan Murad Çelebi b. Mehmed ve mahmiye-i mezbûrede Akşemseddin mahallesinde sâkin Hamza Odabaşı b. Ali ve Mustafa Odabaşı b. el-Hâc Osman nâm kimesneler şehâdetleri ile şer‘an sâbit olan el-Hâc Süleyman Efendi b. el-Hâc Zeynelabidin nâm kimesneler meclis-i şer‘-i şerîf-i enverde müteveffâ-yı mezbûrun karındaşı ve terekesine vâzı‘ü’l-yed olan bâ‘is-i hâze’l-kitâb mezbûr el-Hâc Hasan mahzarında bi’l-vekâle ikrâr ve takrîr-i kelâm edip mezbûr el-Hâc Hasan tereke-i müteveffâ-yı mezbûrdan ber mûceb-i defter-i kassâm makbûzu olan on sekiz yük kırk bin iki yüz yirmi altı riyâlî akçe ber vech-i muharrer müvekkile-i mezbûreye isâbet eden dört yük altmış bin elli altı akçenin üç [62b] yük otuz yedi bin altı yüz elli altı akçesini bundan akdem müvekkilem mezbûre Latife Hâtun’a def‘ ve teslîm ol dahi mezbûr el-Hâc Hasan yedinden ahz u kabz ettiğinden sonra bâkī-i mezbûrun yirmi iki bin dört yüz akçesini müteveffâ-yı mezbûrun babası müteveffâ-yı mezbûr el-Hâc Ali’nin terekesinden olup medîne-i Bosna’da vâki‘ beynlerinde ma‘lûm menzil çiftlik ve dükkân ve sâir kalîl [ve] kesîr terekesinden müvekkile-i mezbûrenin mûrisi müteveffâ-yı mezbûr el-Hâc Mehmed’de isâbet eden hisse-i şer‘iyyesinin ba‘de vefât[ihî] dört sehimden müvekkile-i mezbûreye isâbet eden bir sehim hisse-i şâyi‘asını, terekelerine vâzı‘ü’l-yed olan mezbûr el-Hâc Hasan’dan vekâlet-i mahkiyem hasebiyle da‘vâ ve taleb eylediğimde, ol dahi teslîmden imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip mezbûr el-Hâc Hasan ile beynimizde sekiz yüz yetmiş esedî guruş üzerine inşâ-i akd-i sulh eylediklerinde ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûr sekiz yüz yetmiş guruşu mezbûr el-Hâc Hasan yedinden bi’l-vekâle tamâmen ahz u kabz eylediğimden sonra zikr olunan menzil çiftlik ve dükkâna müteveffâ-yı mezbûrun kalîl ve kesîr [ve] sâir terekesine ve târih-i kitâba gelince müvekkile-i mezbûre ile beynlerinde cereyân eden mu‘âmelât-ı şettâ ve hukūk-ı ma‘lûme [ve] mechûleye müte‘allika âmme-i de‘âvî ve mütâlebâtdan ben bi’l-vekâle mezbûr el-Hâc Hasan’ın zimmetini ibrâ-i âm ile ibrâ ve iskāt edip mezbûr el-Hâc Hasan dahi kezâlik husûs-ı mezkûre ve târih-i mezbûre gelince beynlerinde cereyân eden ahz ve i‘tâ ve hukūk-ı ma‘lûme ve mechûleye müte‘allika cemî‘ de‘âvî ve muhâsamâtdan mezbûr Latife Hâtun’un zimmetini ibrâ-i âmm-ı râfi‘ü’l-hisâm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: Ömer Beşe b. Mustafa, Mehmed Beşe b. el-Hâc Ali, Hüseyin Efendi b. Hasan, Seyyid Abdülkerim [b.] Selahaddin, Seyyid Mehmed b. Hamîd, Yülekci? Ahmed Çelebi, Mehmed b. ( ) Odabaşı, Halil Efendi el-Mütevellî, Topal? Mustafa b. ( ), Receb Beşe b. ( ), Halilî Mehmed Çelebi b. ( ), kazgancı el-Hâc Hasan ve gayruhüm.