İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 281 Hüküm no: 257 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni Hâtun bt. Emînî Mehmed Efendi’nin evini bey‘ bi’listiğlâl yoluyla İbrahim Efendi b. Mehmed’e sattığı Husûs-ı âti’l-beyânın mahallinde tahrîr iltimâs olunmağın savb-ı şer‘den Mevlânâ İbrahim Efendi b. Şaban irsâl olunup ol dahi fahrü’l-muhadderât Ümmühâni Hâtun bt. el-merhûm Emînî Mehmed Efendi’nin mahmiye-i İstanbul’da Çıkrı[k]çı Kemal mahallesinde sâkine olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde mezbûre Ümmühâni Hâtun’un zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hüseyin Beşe b. İsmail ve Mehmed Çelebi b. Ahmed nâm kimesneler şehâdetleri ile şer‘an sâbit olan umdetü’l-mevâli’l-izâm Ahmed Efendi b. Şeyh Abdullah Efendi meclis-i ma‘kūd-ı mezbûrda, fahrü’l-kuzât bâ‘is-i hâze’l-kitâb İbrahim Efendi b. Mehmed nâm kimesne mahzarında bi’l-vekâle ikrâr ve takrîr-i kelâm edip [64a] akd-i âti’z-zikr sudûruna değin müvekkilem mezbûrenin yedinde mülkü ve hakkı olup mahalle-i mezbûrede vâki‘ bir tarafdan ( ) mülkü ve bir tarafdan Kazasker Abdurrahman Efendi mu‘allim-hânesi ve iki tarafdan tarîk-i âm ile mahdûd büyût-ı adîdeyi müştemil menzilini, bi’l-vekâle mezbûr İbrahim Efendi’ye sekiz yüz yirmi sekiz esedî guruşa bi tarîki’l-istiğlâl bey‘ ve teslîm ol dahi iştirâ ve tesellüm edip semen-i mezbûr sekiz yüz yirmi sekiz esedî guruşu bana edâ ve teslîm ben dahi yedinden ahz u kabz ettiğimden sonra mezbûr İbrahim Efendi menzil-i mahdûd-ı mezbûru gıbbe’t-tahliyyeti’ş-şer‘iyye ve’t-takābuzi’l-mer‘î târih-i kitâbdan bir sene tamâmına değin yüz yirmi dört esedî guruşa bana îcâr ve teslîm ben dahi bi’l-vekâle istîcâr ve tesellüm ve kabz eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Derviş Beşe b. Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Efendi b. Mustafa el-Hatîb-i Nişâncı Paşa, el-Hâc Ahmed b. İbrahim Çavuş, Abdurrahman Beşe b. Mehmed, Ahmed Odabaşı b. Mehmed kâğıdcı ve gayruhüm mine’l-hâzırîn.