İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 283 Hüküm no: 259 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Mustafa ile Emine bt. Davud arasındaki alacak meselesinde anlaşmaya vardıkları Mahmiye-i İstanbul’da Sunullah Efendi mahallesi sâkinelerinden olup zâtı ma‘rifet-i şer‘iyye ile ârifân Mehmed b. Gazanfer ve İbrahim Çelebi b. Ramazan ta‘rîfleri ile mu‘arrefe olan Kerime bt. Mustafa nâm hâtun mahfil-i kazâda, mahmiye-i mezbûrede Sofular mahallesi sâkinelerinden Emine bt. Davud nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Şaban Beşe b. Abdullah ve Mustafa Beşe b. Abdullah nâm kimesneler şehâdetleri ile şer‘an sâbit olan zevci Ahmed Bey b. el-Hâc Ali nâm kimesne mahzarında ikrâr ve takrîr-i kelâm edip bundan akdem beynimizde ma‘lûm bir husûs için müvekkile-i mezbûre Emine’ye elli yedi guruşu def‘ ve teslîm ol dahi ahz u kabzetmiş idi hâlâ mezbûre Emine’den ber vech-i muharrer makbûzu olan meblağ-ı mezbûrumu taleb ve da‘vâ eylediğimde, ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûre Emine ile beynimizde beş guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûrdan beş guruşu vekîl-i mezbûr Ahmed Bey yedinden ahz u kabz ettiğimden sonra husûs-ı mezbûra müte‘allika âmme-i da‘vâdan ben müvekkilem mezbûre Emine’nin zimmetini ibrâ ve iskāt edip ve vekîl-i mezbûr Ahmed Bey dahi bedel-i sulh-i mezbûra müte‘allika âmme-i da‘vâdan benim zimmetimi vekâleten ibrâ ve iskāt etti dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Rebî‘ilevvel li sene seb‘a ve semânîn ve elf. Şuhûdü’l-hâl: Ramazan Ağa b. Mahmud el-Mübâşir, Mehmed Ağa b. Hüseyin, İbrahim Çelebi b. Mehmed, Mehmed b. Mustafa, Mehmed b. Abdullah ve gayruhüm.