İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 284 Hüküm no: 260 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın Ayşe bt. Mehmed’e borcu olduğunu kabul ettiği Mahmiye-i İstanbul’da Molla Şeref mahallesi sâkinelerinden bâ‘isetü’l-hâze’l-kitâb Ayşe bt. Mehmed nâm hâtun meclis-i şer‘-i şerîfde zâtı ma‘rifet-i şer‘iyye ile ârifân Ali Beşe b. Ahmed ve İslâm b. Abdullah nâm kimesneler ta‘rîfleri ile mu‘arrefe olan diğer Ayşe bt. Abdullah nâm hâtun mahzarında üzerine da‘vâ ve takrîr-i kelâm edip bundan akdem mezbûre diğer Ayşe yedimden iştirâ ve kabz eylediği beynimizde ma‘lûm iki sof ve bir gömlek ve bir don ve bir uçkur semenlerinden ba‘de küllî hesâb zimmetinde hakkım olan on sekiz guruşun suâl olunup alıverilmesi matlûbumdur dedikde gıbbe’s-suâl mezbûre diğer Ayşe cevâbında fi’l-hakīka müdde‘iye-i mezbûre yedinden ber vech-i muharrer iştirâ ve kabz eylediği beynlerinde ma‘lûm sof ve gömlek ve don ve uçkur semenlerinden ba‘de küllî hesâb müdde‘iye-i mezbûreye meblağ-ı mezbûr on sekiz guruş zimmetinde vâcibü’l-edâ ve lâzımü’l-kazâ deyni olduğunu bi’t-tav‘ ikrâr ve i‘tirâf etmeğin mûcebince müdde‘iye-i mezbûre Ayşe’ye meblağ-ı mezbûr on sekiz guruşu edâya mezbûre diğer Ayşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: İbrahim Çelebi b. Ahmed, Osman Çelebi b. Ömer, Mehmed b. Şaban, Ebûbekir b. Hüseyin, Mustafa b. Mehmed ve gayruhüm.