İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 284 Hüküm no: 261 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bektaş b. Abdullah ile Mehmed Efendi ve Ahmed Ağa arasındaki borç meselesinde anlaşma sağlandığı Mahmiye-i İstanbul’da Sancakdâr Hayreddin mahallesi sâkinlerinden el-Hâc Bektaş b. Abdullah nâm kimesne meclis-i şer‘-i şerîfde kendi tarafından asîl ve sâbıkan Yenişehir kadısı olan a‘lemü’l-ulemâ’i’l-izâm, efdalü’l-fuzalâ’i’l-fihâm yenbû‘ü’l-fezâ’il metbû‘ü’l-efâzıl sâhib-i hâze’l-kitâb Mehmed Efendi b. Hurrem Ağa tarafından husûs-ı âti’l-beyâna vekîl olduğu Ahmed Çavuş b. Hüseyin ve Süleyman Efendi b. Hasan nâm kimesneler şehâdetleri ile şer‘an sâbit olan kethüdâsı Ahmed Ağa b. Mehmed nâm kimesne mahzarında ikrâr ve takrîr-i kelâm edip mûmâ-ileyhimâ Mehmed Efendi ve Ahmed Ağa zimmetlerinde cihet-i deyn-i şer‘îden üç bin yüz seksen dört esedî guruş hakkım olup meblağ-ı mezbûrun bi’d-defe‘ât iki bin yirmi dokuz esedî guruşunu mukaddemâ medîne-i Yenişehir’de mûmâ-ileyhimâ Mehmed Efendi ve Ahmed Ağa yedlerinden ahz u kabz edip bin yüz elli iki esedî guruşu zimmetlerinde bâkī kalmışdı. Meblağ-ı bâkī-i mezbûru mûmâ-ileyhimâ Mehmed Efendi ve Ahmed Ağa’dan da‘vâ ve taleb ettiğimde anlar dahi inkâr etmekle beynimizde münâza‘ât-ı kesîre ve muhâsamât-ı şedîde vukū‘undan sonra muslihûn tavassut edip mûmâ-ileyhimâ Mehmed Efendi ve Ahmed Ağa ile beynimizde yüz yirmi esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yüz yirmi esedî guruşu yedlerinden tamâmen ahz u kabz ettiğimden sonra meblağ-ı bâkī-i mezbûra ve târih-i kitâba gelince mûmâ-ileyhimâ Mehmed Efendi ve Ahmed Ağa ile beynimizde cereyân eden cemî‘ ahz ve i‘tâ ve mu‘âmelât-ı şettâya müte‘allika âmme-i da‘vâdan ben mûmâ-ileyhimâ Mehmed Efendi ve Ahmed Ağa’nın zimmetlerini ibrâ ve iskāt edip mûmâ-ileyhimâ Mehmed Efendi ve Ahmed Ağa dahi benim zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Hüseyin b. Mahmud, Osman Çelebi b. Ömer, Ebûbekir b. Hüseyin, Mehmed b. Mehmed, Mustafa Beşe b. Abdi.