İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 285 Hüküm no: 262 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vartan v. Altun ile Minav v. Yani arasındaki alacak meselesinde sulh olunduğu Mahmiye-i İstanbul’da Kasım Ağa mahallesinde sâkin bâ‘is-i hâze’s-sifr Vartan v. Altun nâm zimmî meclis-i şer‘-i şerîfde Minav v. Yani nâm zimmî mahzarında üzerine da‘vâ ve takrîr-i kelâm edip mezbûr Minav zimmetinde ba‘de küllî hesâb beynimizde ma‘lûm çuka semeninden on üç esedî guruş ve bir zolota hakkım olmağın suâl olunup meblağ-ı mezbûr on üç esedî guruş ve bir zolotanın alıverilmesi matlûbumdur dedikde gıbbe’s-suâl mezbûr Minav cevâbında ba‘de küllî hesâb meblağ-ı mezbûr on üç esedî guruş ve bir zolotayı zimmetinde deyni olduğunu inkârından sonra yemînden nükûl etmeğin beynimizde nizâ‘-ı küllî vukū‘undan sonra muslihûn tavassut edip mezbûr Minav ile dokuz esedî guruş ile bir zolota üzerine beynimizde inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan dokuz esedî guruş ve bir zolotayı mezbûr Minav’a dokuz ay taksît ve her ayda bir guruşunu mezbûr Vartan’a edâsı mezbûr Minav’a tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min saferi’l-hayr li sene seb‘a ve semânîn ve elf. Şuhûdü’l-hâl: Osman Çelebi b. ( ) el-Muhzırân, İbrahim Çelebi b. ( ) el-Muhzırân, Süleyman Çelebi b. Receb, İbrahim Çelebi b. Mehmed.