İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 286 Hüküm no: 263 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Şaban’da bulunan beygirin, sahibi Yakub b. Mehmed’e teslimi Mahmiye-i İstanbul’da Akbıyık mahallesinde sâkin Yakub b. Mehmed nâm kimesne meclis-i şer‘-i münîrde, Receb b. Şaban nâm şâbb-ı emred mahzarında üzerine da‘vâ ve takrîr-i kelâm edip işbu meclisde mevcûd ve müşârün-ileyh olan doru bârgiri yedimde mülk ve hakkım olup târih-i kitâbdan iki aydan mukaddem mülkümden zâyi‘ olmuş idi hâlâ mezbûr Receb yedinde bulmağla suâl olunup mârrü’z-zikr bârgiri bana def‘ ve teslîme tenbîh olunmak matlûbumdur dedikde gıbbe’s-suâl mezbûr Receb cevâbında sâlifü’z-zikr bârgiri târih-i kitâbdan bir ay mukaddem mahmiye-i mezbûrede Kel İbrahim nâm canbâzdan altı esedî guruş ile bir rub‘ semen-i makbûza iştirâ ve kabûl edip mülk-i müşterâm olmağla vaz‘-ı yed ederim, müdde‘î-i mezbûrun mülkü olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sâkinlerinden Bâli Dede b. Cafer ve İbrahim b. Mevlüd nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mahalde mevcûd ve müşârün-ileyh olan zikri mürûr eden dor[u] bârgir müdde‘î-i mezbûr Yakub’un mülküdür, târih-i kitâbdan iki aydan mukaddem mülkünden zâyi‘ olmuş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince mârrü’z-zikr bârgiri müdde‘î-i merkūm Yakub’a def‘ ve teslîme mezbûr Receb’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilevvel li sene seb‘a ve semânîn ve elf. Şuhûdü’l-hâl: İmâm Abdurrahman Efendi b. Mehmed, es-Seyyid Muharrem Efendi, İbrahim Çelebi b. Mehmed, Ebûbekir b. Hüseyin ve gayruhüm.