İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 286 Hüküm no: 264 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı köle Rüstem b. Abdullah’ın hür olduğunun ispatı Aşağıdaki sicilde yazılanlar Bolu livâsı askerî kassâmı Zeynîzâde diye meşhûr Ahmed tarafından yazılmıştır -ufiye anhümâ-. İşbu uzun boylu açık kaşlı kara gözlü Rûsiyyü’l-asl hâmilü’l-kitâb Rüstem b. Abdullah nâm gulâm mahfil-i kazâda Mengen kazâsı müzâfâtından Rükneddin nâm karye sâkinlerinden iken bundan akdem vefât eden eşrefü’l-kuzât Abdülkerim Efendizâde Mehmed Efendi’nin sulbî kebîr oğulları Mustafa Efendi ve Ahmed Çelebi ve Fethullah Çelebi muvâcehelerinde takrîr-i kelâm ve bast-ı merâm edip ben müteveffâ-yı mezkûrun abd-i memlûkü olmağla müteveffâ-yı mezkûr hâl-i hayâtında ve kemâl-i akl-i sıhhatinde beni tedbîr-i mutlak ile müdebber edip vefât etmekle sebîlim tahliyye olmuşken hâlâ verese-i mezkûrûn rık olmak zu‘mu ile bana vaz‘-ı yed ederler şer‘le suâl olunup icrâ-yı hak olunmak matlûbumdur dedikde gıbbe’s-suâl ve akībe’l-inkâr gulâm-ı mezbûrdan kelâmını mübeyyine beyyine taleb olundukda udûl-i ricâlden Mustafa Efendi b. İbrahim Efendi ve Osman Efendi b. Sadık Efendi ve Hüseyin Çelebi b. Muharrem Efendi nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı mezkûr vefâtından mukaddem hâl-i hayâtında ve kemâl-i akl-i sıhhatinde bizim huzûrumuzda gulâm-ı mevsûf-ı ma‘hûdu tedbîr-i mutlak ile müdebber eylemişdi biz bu husûsa minvâl-i muharrer üzre şâhidleriz, şehâdet-i şer‘iyye dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup ve her vechile sülüs malın dahi müsâ‘adesi olmağın mûcebiyle ıtkına hükm ve verese-i mezbû[rî]ni bî-vech mu‘ârazadan men‘ birle, mâ vaka‘a bi’t-taleb ketb ü tahrîr ve yed-i tâlibe def‘ ve teslîm olundu. Tahrîren fî evâhiri şehri Cemâziyelâhir li sene sitte ve semânîn ve elf. Şuhûdü’l-hâl: Fahrü’l-kuzât Şeyh Mehmed Efendi, Abdülbâkī Efendi el-kadı, Mustafa Efendi el-kadı, Yusuf Efendi el-kadı, Hasan Efendi el-kadı, Mehmed Çelebi b. Abdülmümin Efendi, Ebûbekir Efendi b. el-Hâc Yusuf ve gayruhüm.