İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 288 Hüküm no: 266 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. İbâdî ile Abdülkerim b. Ali’nin boşandıkları ve zimmetlerini ibrâ ettikleri Mahmiye-i İstanbul’da Akşemseddin mahallesi sükkânından Mehmed b. Ali ve Yusuf b. Ahmed nâm kimesneler ta‘rîfleri ile mu‘arrefe olan mahalle-i mezbûre sâkinelerinden Emine bt. İbâdî nâm hâtun mahfil-i kazâda, zevc-i dâhili bâ‘is-i hâze’l-kitâb Abdülkerim b. Ali nâm kimesne mahzarında ikrâr ve takrîr-i kelâm edip zevcim mezbûr Abdülkerim zimmetinde mütekarrir ve ma‘kūdun-aleyh olan yedi yüz akçe mehr-i müeccelim üzerine ve nafaka-i iddet ve me’ûnet-i süknâm dahi kendi üzerime olmak üzre istifrâş ettiğimiz bir döşek bir yorgan bir minder bir çift yastıkdan fâriğaten zevcim mezbûr Abdülkerim ile muhâla‘a-i sahîha-i şer‘iyye ile muhâla‘a edip ba‘de’l-yevm hukūk-ı zevciyyete müte‘allika ve mârrü’z-zikr bir döşek bir yorgan bir minder bir çift yastığa müte‘allika âmme-i da‘vâdan ben zevcim mezbûr Abdülkerim’in zimmetini ibrâ ve iskāt edip ol dahi benim zimmetimi ibrâ ve iskāt etti dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilevvel li sene seb‘a ve semânîn ve elf min hicreti men lehü’l-izzi ve’ş-şeref. Şuhûdü’l-hâl: Mehmed b. Ali, Yusuf b. Ahmed, İbrahim b. Mehmed, diğer İbrahim Çelebi b. Mehmed, el-Hâc Mustafa b. Tevekkül, Hüseyin b. Ebûbekir, Mustafa b. Abdullah, Mehmed b. Mehmed.