İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 288 Hüküm no: 267 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. el-Hâc Rıdvan ile kocası Ahmed Beşe b. Abdullah’ın aralarındaki câriye, bıçak ve mehir meselesinde anlaştıkları Mahmiye-i İstanbul’da Debbâğ Yunus sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından İmâm Abdullah Efendi b. Mahmud Abdullah Çelebi b. Ahmed nâm kimesneler ta‘rîfleri ile mu‘arrefe olan Fâtıma bt. el-Hâc Rıdvan nâm hâtun meclis-i şer‘-i şerîfde zevc-i dâhili Ahmed Beşe b. Abdullah nâm kimesne mahzarında ikrâr-ı tâm ve takrîr-i kelâm edip târih-i kitâbdan beş sene mukaddem zevcim mezbûr Ahmed Beşe benim iznim ile evsâfı beynimizde ma‘lûm iki re’s Rûsiyyetü’l-asl câriyelerim ile bir re’s Gürciyyü’l-asl câriyemi altmış esedî guruşa bey‘ edip semenleri olan cem‘an yüz elli esedî guruşu zevcim mezbûr Ahmed Beşe bana def‘ ve teslîm ben dahi yedinden tamâmen ahz u kabz eyledim. Min ba‘d zikr olunan câriyelerin semenleri olan meblağ-ı mezbûr yüz elli guruşdan zevcim mezbûr Ahmed Beşe yedinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mezbûre Fâtıma hâtun zevc-i mezbûr Ahmed Beşe mahzarında i‘âde-i kelâm edip zevcim mezbûr Ahmed Beşe zimmetinde mütekarrir ve ma‘kūdun-aleyh olan on bin akçe mehr-i müeccelimin dokuz bin beş yüz akçesini zevcim mezbûr Ahmed Beşe’ye hibe-i sahîha-i şer‘iyye ile hibe ve temlîk, ol dahi meclis-i hibede ittihâb ve temellük ve kabûl eylediğinden sonra mezbûr Ahmed Beşe dahi meblağ-ı mezbûr mukābelesinde ivaz olmak üzre bir altın kılıflı yarma balık dişi kabzalı bıçağını bana def‘ ve teslîm ben dahi ber vech-i muharrer ahz u kabz eylediğimden sonra meblağ-ı mezbûr dokuz bin beş yüz akçeye müte‘allika da‘vâdan ben zevcim mezbûr Ahmed Beşe’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim, zevcim mezbûr Ahmed Beşe dahi [66b] mârrü’z-zikr bıçağa müte‘allika da‘vâdan benim zimmetimi ibrâ eyledi dedikde mezbûr Ahmed Beşe zevcesi mukırra-i mezbûre Fâtıma Hâtun’u cemî‘ kelimât-ı meşrûhasında vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sânî min Rebî‘ilevvel li sene seb‘a ve semânîn ve elf. Şuhûdü’l-hâl: Abdullah Efendi b. Mehmed el-İmâm, Abdullah Çelebi b. Ahmed, İsmail Çelebi b. Mustafa, İbrahim Efendi b. Mustafa el-Müezzin, Mehmed Çelebi b. Abdullah ed-Dellâl, Mehmed Beşe ve gayruhüm.