İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 289 Hüküm no: 268 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karaca Foça’da vefat eden Beşir Çelebi’nin mallarına el koyan iş ortağı Mehmed b. Hasan ile vârisleri arasındaki miras meselesinde bedel karşılığı sulh olunduğu Mahmiye-i İstanbul’da Deniz Abdal mahallesinde sâkin olup bundan akdem ticâret tarîkiyle medîne-i İzmid’den gelir iken Karaca Foça nâm karyede vefât eden Beşir Çelebi b. Mehmed’in zevce-i metrûkesi ve evlâd-ı sıgārına kıbel-i şer‘den mansûbe vasîsi olup zâtı ma‘rifet-i şer‘iyye ile ârifân Muharrem Efendi b. Mehmed ve İbrahim b. Seydî nâm kimesneler ta‘rîfleriyle mu‘arrefe olan Ayşe bt. İbrahim nâm hâtun meclis-i şer‘-i şerîfde işbu bâ‘isü’l-kitâb Mehmed b. Hasan nâm kimesne mahzarında asâleten ve vesâyeten ikrâr ve takrîr-i kelâm edip mezbûr Mehmed mûrisim müteveffâ-yı mezbûrun şerîki ve terekesine vâzı‘ü’l-yed olmağın müteveffâ-yı mezbûrun terekesinden bana ve evlâd-ı sıgārına isâbet eden hisse-i şer‘iyyemizi mezbûr Mehmed’den asâleten ve vesâyeten da‘vâ ve taleb eylediğimde, ol dahi müteveffâ-yı mezbûr ile şerîkler olup terekesine vâzı‘ü’l-yed olduğunu inkâr etmekle ben dahi vech-i muharrer üzre müdde‘âmı isbâta kādire olmayıp ve mezbûr Mehmed’in yemîn etmesi dahi müte‘ayyin olmağla muslihûn tavassut edip mezbûr Mehmed ile beynimizde bin akçe üzerine inşâ-i akd-i sulh eylediklerinde ben dahi vech-i muharrer üzre sulhü her vechile bana ve müteveffâ-yı mezbûrun evlâd-ı sıgārına enfa‘ ve evlâ olmağın asâleten ve vesâyeten sulh-i mezbûru kabûl ve bedel-i sulh olan meblağ-ı mezbûr bin akçeyi mezbûr Mehmed yedinden ahz u kabz eylediğimden sonra tereke-i müteveffâ-yı mezbûra müte‘allika cemî‘ de‘âvî ve mütâlebâtdan bi’l-asâle mezbûr Mehmed’in zimmetini ibrâ-i âm ile ibrâ ve iskāt ettim dedikde gıbbe’t-tasdîki’ş-şer‘î müteveffâ-yı mezbûrun li eb karındaşı olan işbu hâzır bi’l-meclis İbrahim nâm kimesne dahi meclis-i mezkûrda merkūm Mehmed mahzarında ikrâr ve takrîr-i kelâm edip ben dahi tereke-i müteveffâ-yı mezbûra müte‘allika cemî‘ da‘vâdan mezbûr Mehmed ile merkūme Ayşe Hâtun’un zimmetlerini ibrâ-i âmm-ı râfi‘ü’l-hisâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Rebî‘ilevvel li sene seb‘a ve semânîn ve elf. Şuhûdü’l-hâl: Muharrem Efendi b. Mehmed, İbrahim b. Seyyid, Mahmud b. Hasan, Mehmed b. Muslu, Ahmed b. Mehmed, Mehmed Efendi b. Mehmed, İbrahim Çelebi b. Ahmed, Osman b. Ömer ve gayruhüm.