İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 290 Hüküm no: 269 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın Pazarcı Ali b. Ebûbekir’le evli olduğu ve evlilik gereklerini yerine getirmekten çekinmemesinin kendisine tembih edildiği Mahrûse-i Üsküdar’da Gülfem mahallesi sâkinlerinden râfi‘-i hâze’l-kitâb Pazarcı Ali b. Ebûbekir nâm kimesne meclis-i şer‘-i şerîfde mübânesi olup kendi firâşından hâmil olmağla mu‘teddesi olup mahrûse-i mezbûrede Sinan Paşa mahallesi sâkinlerinden Ayşe bt. Abdullah nâm hâtun mahzarında üzerine da‘vâ ve takrîr-i kelâm edip târih-i kitâbdan dört gün mukaddem mezbûre Ayşe nefsini bana tesmiye-i mehir ile şuhûd mahzarında inkâh ve tezevvüc için tarafından işbu hâzır bi’l-meclis Hasan Efendi b. Yakub nâm kimesneyi vekîl edip ol dahi ba‘de kabûli’l-vekâle mezbûre Ayşe’yi dört bin beş yüz akçe mehr-i müeccel ile şuhûd mahzarında bana inkâh ve tezvîc, ben dahi tezevvüc ve kabûl edip mezbûre Ayşe zevce-i menkûham olmuşken, hâlâ mezbûre Ayşe benim ile ezvâc mu‘âmelesinden imtinâ‘ etmemek üzre tenbîh olunmak matlûbumdur dedikde gıbbe’s-suâl mezbûre Ayşe cevâbında mezbûr Hasan Efendi’yi ber vech-i muharrer tevkîlini ve mezbûr Hasan Efendi’nin vech-i muharrer üzre inkâh ve tezvîcini inkâr etmeğin müdde‘î-i mezbûrdan evvelâ mezbûr Hasan Efendi’nin ber vech-i muharrer vekâletine beyyine taleb olundukda mahrûse-i mezbûrede Kefçe mahallesi sâkinlerinden Ramazan b. Abdurrahman ve Hasan b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan dört gün mukaddem mezbûre Ayşe nefsini tesmiye-i mehir ile şuhûd mahzarında müdde‘î-i mezbûra inkâh [67a] ve tezvîc için tarafından mezbûr Hasan Efendi’yi bizim huzûrumuzda vekîl edip mezbûr Hasan Efendi dahi vekâlet-i mezbûreyi kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye edip ve sâniyen mezbûr Hasan Efendi’nin vech-i muharrer üzre inkâh ve tezvîcine beyyine taleb olundukda zikr olunan Sinan Paşa mahallesi imâmı olan es-Seyyid Ali Efendi b. Mehmed nâm kimesne ile mezbûr Hasan li ecli’ş-şehâde meclis-i şer‘a hâzırân olup istişhâd olunduklarında fi’l-hakīka vekîl-i mezbûr Hasan Efendi târih-i kitâbdan dört gün mukaddem mezbûre Ayşe’yi dört bin beş yüz akçe mehr-i müeccel ile müdde‘î-i mezbûr Ali’ye bizim huzûrumuzda inkâh ve tezvîc, ol dahi tezevvüc ve kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şuhûd-ı mezbûrûn Ramazan ve Hasan ve es-Seyyid Ali Efendi’nin keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz evvelâ zikr olunan Kefçe mahallesine varıp ahâlîsinden İmâm Hasan Efendi b. Süleyman ve Ali Efendi b. İbrahim ve Hasan Dede b. Ramazan ve Ahmed Beşe b. Hasan ve Müezzin İbrahim b. Ahmed ve Attâr el-Hâc Kasım b. Mehmed ve Mehmed Çelebi b. Sefer ve Mustafa Çelebi b. Ali ve el-Hâc Ahmed b. el-Hâc Osman ve Yusuf Beşe b. Mustafa ve Ebûbekir b. Osman nâm kimesnelerden şâhidân-ı mezbûrân Ramazan ve Hasan’ın keyfiyyet-i hâllerini suâl edip ve sâniyen zikr olunan Sinan Paşa mahallesine varıp ahâlîsinden Şeyh Abdurrahman Efendi b. Mustafa ve Yusuf Dede b. İsmail ve el-Hâc Hüseyin b. Abdullah ve Ahmed b. Kasım nâm kimesnelerden şâhid-i mezbûr es-Seyyid Ali Efendi’nin keyfiyyet-i hâlini suâl eyledikde her biri şuhûd-ı mezbûrûn için udûl ve makbûlü’ş-şehâdedir deyû haber verdiklerini mahallinde tahrîr, ba‘dehu ma‘an irsâl olunan Mehmed b. Mehmed ile meclis-i şer‘a gelip alâ vukū‘ihi inhâ ve takrîr etmeğ[in] sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince müdde‘î-i mezbûr Ali ile ezvâc mu‘âmelesinden imtinâ‘ etmemek üzre mezbûre Ayşe’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Kemaleddin Kethüdâ-yı Hazret-i Efendi, Hüseyin Çelebi b. Üveys hazînedâr, Hasan Beşe Çukadârî, Musa Çelebi b. Receb, İbrahim Çelebi b. Ahmed, Osman Çelebi b. Ömer.