İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 295 Hüküm no: 271 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasî Ayşe bt. Mustafa’nın muhafazasındaki beygiri öldüren Mehmed Beşe b. Mustafa’dan parasının tahsil edilmesi Mahrûse-i Galata’ya tâbi‘a kasaba-i Kasımpa[şa’]da Tozkoparan mahallesinde sâkin iken bundan akdem vefât eden Ahmed b. Halil nâm kimesnenin evlâd-ı sıgārının tesviye-i umûruna kıbel-i şer‘den mansûbe vasîsi olup zâtı ma‘rifet-i şer‘iyye ile ârifân Ahmed b. Yusuf ve diğer Ahmed b. Abdullah nâm kimesneler ta‘rîfleri ile mu‘arrefe olan Ayşe bt. Mustafa nâm hâtun meclis-i şer‘-i şerîfde Dergâh-ı âlî yeniçeri[leri]nin doksan dördüncü cemâ‘atine mahsûs oda yoldaşlarından bâ‘is-i hâze’l-kitâb Mehmed Beşe b. Mustafa nâm kimesne mahzarında bi’l-vesâye üzerine da‘vâ ve takrîr-i kelâm edip müteveffâyı mezbûrun ile’l-vefât yedinde mülkü olup ba‘de vefâtihî evvelâ sıgārına intikāl eden on esedî guruş kıymetli yağız doru bârgirini mezbûr Mehmed Beşe târih-i kitâbdan ( ) gün mukaddem bıçakla darb ve katl etmekle hâlen suâl olunup kıymeti olan meblağ-ı mezbûr on esedî guruşun bi’l-vesâye alıverilmesi matlûbumdur dedikde gıbbe’s-suâl mezbûr Mehmed Beşe cevâbında fi’l-vâki‘ zikr olunan bârgiri bıçakla darb ve katl eyledi[ği]ni ikrâr, lâkin mârrü’z-zikr bârgirin kıymeti ancak sekiz esedî guruşdur deyû ziyâdeyi inkâr edicek müdde‘iye-i mezbûreden ziyâde da‘vâsıyçün beyyine taleb olundukda udûl-i müslimînden olup mahalle-i mezbûre sükkânından mezbûrân Ahmed b. Yusuf ve diğer Ahmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ sâlifü’z-zikr bârgirin kıymeti mezbûr Mehmed Beşe’nin katl eylediği hînde on esedî [69a] guruş idi biz husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle mârrü’z-zikr bârgirin kıymet-i şer‘iyyesi olan meblağ-ı mezbûr on esedî guruşu müdde‘iye-i mezbûre Ayşe Hâtun’a edâ ve teslîme mezbûr Mehmed Beşe’ye tenbîh olundukdan sonra mezbûre Ayşe Hâtun i‘âde-i kelâm edip ânifen teslîmine tenbîh olunan meblağ-ı mezbûr on esedî guruşu mezbûr Mehmed Beşe yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Odabaşı, el-Hâc Süleyman b. Ebûbekir, Ali Beşe b. Osman, Bayram b. Osman, Bayram Beşe b. Ali,Aşçı Hüseyin Beşe b. Abdullah, el-Hâc İsâ b. Himmet ve gayruhüm.