İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 296 Hüküm no: 272 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in evini Alime ve Meryem bt. Mehmed’e sattığı Mahalle-i İstanbul’da Sultan Selim câmi‘-i şerîfi kurbunda Çukur Sinan mahallesi sükkânından İbrahim b. Mehmed nâm kimesne meclis-i şer‘-i şerîfde bâ‘is-i hâze’l-kitâb Âlime ve Meryem bintey Mehmed nâm hâtun mahzarlarında ikrâr ve takrîr-i kelâm edip bin seksen altı senesi Rebî‘ulevveli’nin on birinci günü yedimde mülküm ve hakkım olup mahalle-i mezbûrede vâki‘ bir tarafdan el-Hâc Yusuf nâm kimesne mülkü ve bir tarafdan mezbûr Meryem nâm hâtun mülkü ve bir tarafdan Halime bt. Ebûbekir nâm hâtun mülkü ve bir tarafdan Havvâ Hâtun veresesi mülkleri ile mahdûd, fevkānî bir bâb oda ve tahtapûş ve tahtânî bir bâb oda ve bir su kuyusu ve bir kenîfi müştemil menzilimi, bi cümleti’t-tevâbi‘ ve’l-levâhık mezbûretân Âlime ve Meryem hâtunlara tarafeynden îcâb ve kabûlü hâvî şurût-ı müfsideden ârî bey‘-i kat‘î ile yüz kırk esedî guruşa bey‘ ve teslîm anlar dahi ale’l-iştirâki’s-seviy iştirâ ve tesellüm ettiklerinden sonra semeni olan meblağ-ı mezbûru kırk esedî guruşun elli dört guruşunu yedlerinden ahz u kabz edip seksen altı guruşunu târih-i mezbûrdan bir sene tamâmına değin te’cîl eylemiş idim hâlâ ecel-i mezbûr hulûl etmekle mezbûretân Âlime ve Meryem meblağ-ı müeccel-i mezbûr seksen altı guruşu bana edâ ve teslîm ben dahi yedlerinden tamâmen ahz u kabz eyledim dedikde mukırr-ı mezbûr İbrahim’i mezbûretân Âlime ve Meryem’den her biri takrîr-i meşrûhunda vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fî gurreti Rebî‘ilevvel li sene seb‘a ve semânîn ve elf. Şuhûdü’l-hâl: Aziz Çelebi b. Şaban, Ali Efendi b. Mehmed, Davud Beşe b. Kasım, Mustafa Beşe b. Mehmed, Ali Beşe b. Mehmed, el-Hâc Yusuf, İbrahim b. Ali, Mehmed Çelebi b. İbrahim, Mehmed Çelebi b. Himmet, Receb Çelebi b. İsmail, Ahmed Bey b. Mehmed.