İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 297 Hüküm no: 273 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. el-Hâc Mehmed’i haps edip haksız yere para ve eşyalarını elinde bulunduran eski Edirne gümrük emîni Ali Ağa’dan bunları geri aldığı Fi’l-asl vilâyet-i Anadolu’da medîne-i Ayntâb ahâlîsinden olup mahmiye-i İstanbul’da ( ) mahallesinde misâfiren sâkin olan Hasan Bey b. el-Hâc Mehmed nâm kimesne meclis-i şer‘-i şerîfde sâbıkan mahrûse-i Edirne’de gümrük emîni olan bâ‘is-i hâze’l-kitâb fahrü’l-akrân Ali Ağa b. Abdi nâm kimesneler şehâdetleri ile şer‘an sâbit olan Murad Ağa b. Ramazan nâm kimesne mahzarında ikrâr ve takrîr-i kelâm edip bin seksen iki senesi Zilhiccesi’nin yirmi yedinci günü mahrûse-i mezbûrede yava cizyedârı olan Hüseyin Ağa tarafından müvekkil-i mezbûr Ali Ağa bana, senin yedinde yava cizyesi tezkiresine müte‘allika mühürlü cizye kâğıdı bulundu deyip beni ahz ve haps ettiğinden sonra bir re’s gulâm ve bir neftî londrine çuka yelek ve bir sîm gaddâre ve bir Frengî kılıç ve bir köhne yorgan ve dört meksûr fincan ve bir kutu ve bir kırmızı kilim ve bir köhne tîrkeş ve bir köhne alaca kilim ve on üç zirâ‘ yeşil londrine çuka ve dokuz zirâ‘ kırmızı Londrine çuka ve dört zirâ‘ mor Londrine çuka ve bir sâde çapkun rahtı ve bir beyaz velense ve bir tencere ve bir boğça ve bir makrama ve bir uçkur ve bir köhne ihrâm ve bir alaca peşkir ve bir ibrik ve bir kurşun raht ve bir kahve ibriği ve bir sîm raht ve rişme ve bir müsta[‘]mel benefşe kürk ve bir sîm hançer ve iki hamam sileceği ve bir köhne kaftan ve bir köhne gömlek ve bir zıbın ve bir sagīr yastık ve bir tava ve bir köhne sarık ve bir sahan ve bir kara raht ve bir köhne çultar ve bir köhne heybe ve bir kubur-ı devât ve yirmi altı guruş ve seksen üç sümün ve beş yüz altmış beş hurda akçeyi fuzûlen ahz u kabz etmekle ben dahi zikr olunan gulâm ve eşyâ ve meblağları mezbûr Ali Ağa’dan taleb ve da‘vâ ettiğimde ol dahi cevâbında zikr olunan gulâm ve eşyânın cümlesini sûk-ı sultânîde on dört bin yedi yüz elli akçeye bey‘ ve kabz-ı semen etmiş idim demekle ben dahi mücîz olmağın mezbûr Ali Ağa semen-i mezbûr on dört bin yedi yüz elli akçe ve yirmi altı guruş ve seksen üç sümün ve beş yüz altmış beş akçeyi bana def‘ ve teslîm ben dahi yedinden ahz u kabz eylediğimden sonra husûs-ı mezbûra müte‘allika âmme-i da‘vâdan müvekkil-i mezbûr Ali Ağa’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İslâm Çavuş b. Hüseyin el-Mübâşir, el-Hâc Ahmed b. Ramazan, İbrahim Çelebi b. Ahmed, es-Seyyid Mahmud Çelebi b. Ömer, es-Seyyid Ahmed b. ( ) ve gayruhüm.