İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 298 Hüküm no: 274 Orijinal metin no: [69b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiçor v. Ezkor’un, Premedi’nin Koşnaviş köyündeki bağını, Süleyman Beşe b. Kurd’a sattığı Vilâyet-i Rumeli’nde Premedi kazâsına tâbi‘ Koşnaviç nâm karye ahâlîsinden olup mahmiye-i İstanbul’da Çelebioğlu mahallesinde sâkin Kiçor v. Ezkor nâm zimmî bâ‘is-i hâze’l-kitâb Süleyman Beşe b. Kurd nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede Lokeşede demekle ma‘rûf mevzi‘de vâki‘ iki tarafdan vâdi ve iki tarafdan tarîk-i âm ile mahdûd iki kıt‘a bağımı, mezbûr Süleyman Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz guruşa bey‘ ol dahi iştirâ ve kabûl ettiğinden sonra tefvîz-i [70a] câ’i’z-zikrin sudûruna değin taht-ı tasarrufumda olup karye-i mezbûre sınırı dâhilinde vâki‘ beyne’l-ahâlî ve’l-cîrân ma‘lûmü’l-hudûd tahmînen altı keyl tohum istî‘âb eder eşcâr-ı müsmire ve gayr-i müsmiresi ile dört kıt‘a tarlalarımın hakk-ı tasarrufu sâhib-i arz ma‘rifetiyle yirmi iki guruş bedel mukābelesinde mezbûr Süleyman Beşe’ye ferâğ ve tevfîz, ol dahi tefevvüz ve kabûl ettiğinden sonra meblağ-ı mezbûr otuz guruş ile bedel-i mezbûr yirmi iki guruş min haysi’l-mecmû‘ elli iki guruşu mezbûr Süleyman Beşe yedinden tamâmen ahz u kabz ettiğimden sonra mârrü’z-zikr bağ ve tarlaları mahallerinde zabt ve tasarrufa mezbûr Süleyman Beşe’yi taslît eyledim, ba‘de’l-yevm bağ-ı mahdûd-ı mezkûr mezbûr Süleyman Beşe’nin mülk-i müşterâsı olup ve sâlifü’z-zikr tarlalar hakk-ı makbûzudur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Sinan Beşe b. Mehmed, Mehmed Beşe b. Hüseyin, Hüseyin Beşe b. Kasım, Ali Beşe b. Behrâm, Hüseyin Beşe b. Hızır, Rüstem Beşe b. Hüseyin, İbrahim Çelebi, Ali Beşe b. Bâli.