İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 303 Hüküm no: 281 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Abdullah ile kardeşi İsmihân’ın ortaklaşa kullandıkları Kehleli Ali Paşa Vakfı’na ait evi bedeli karşılığı Mehmed Efendi b. Osman’a devrettikleri Mahmiye-i İstanbul’da Derviş Ali mahallesi sâkinlerinden Halil b. Abdullah nâm kimesne ile li eb kız karındaşı İsmihân nâm hâtun tarafından husûs-ı âti’l-beyâna vekîl olduğu mezbûre İsmihân’ın zâtını ma‘rifet-i şer‘iyye ile ârifân İbrahim Çelebi b. Müstedâm ve Mehmed Efendi b. Ahmed nâm kimesneler şehâdetleri ile sâbit olan el-Hâc İsmail b. Süleyman nâm kimesne meclis-i şer‘de, bâ‘is-i hâze’l-kitâb Mehmed Efendi b. Osman [nâm] kimesne mahzarında bi’l-vekâle ikrâr ve takrîr-i kelâm edip merhûm Kehleli Ali Paşa vakfından icâreteyn-i ma‘lûmeteyn ile müvekkilân-ı mezbûrân Halil ve İsmihân ale’l-iştirâki’s-seviy taht-ı tasarruflarında olup mahalle-i mezbûrede vâki‘ bir tarafdan Ali nâm kimesne menzili ve bir tarafdan İğneci Hüseyin nâm kimesne menzili ve bir tarafdan el-Hâc Hüseyin menzili ve bir tarafdan tarîk-i hâs ile mahdûd bir bâb tahtânî oda ve bir kenîfi müştemil menzili, mezbûr Mehmed Efendi’ye iki bin akçe bedel mukābelesinde izn-i mütevellî ile ferâğ ve tefvîz ol dahi kabûl ve tefevvüz ettiğinden sonra bedeli olan meblağ-ı mezbûr iki bin akçenin bin yedi yüz akçesi için vakf-ı mezbûra deynim olmağla vakf-ı mezbûr câbisi diğer Mehmed Efendi nâm kimesneyi mezbûr Mehmed Efendi üzerine havâle edip ol dahi mezbûr Mehmed Efendi ile havâle-i mezbûreyi kabûl ettiğinden sonra üç yüz akçesini dahi nakid bana edâ ve teslîm ben dahi ahz u kabz eyledim ba‘de’l-yevm menzil-i mahdûd-ı mezbûr merkūm Mehmed Efendi’nin hakk-ı makbûzudur emsâli gibi mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf. Şuhûdü’l-hâl: Molla Hasan b. Ahmed, Ali Efendi b. ( ), Hüseyin Efendi b. ( ), İsmail Efendi b. Muslu?, Süleyman Çelebi b. ( ) Ömer Beşe b. ( ), Mustafa Çelebi b. Hasan Bey ve gayruhüm.