İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 304 Hüküm no: 282 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden el-Hâc Hüseyin’in vârisleri ile ona borçlu olan Hırisori’nin vârislerinin davalarında sulh oldukları Mahmiye-i İstanbul’da Edirnekapısı dâhilinde el-Hâc Muhyiddin mahallesi sâkinlerinden iken bundan akdem vefât eden el-Hâc Hüseyin nâm kimesnenin verâseti zevce-i metrûkesi Şahbaz bt. Abdullah nâm hâtun ile sulbî oğlu Mehmed ve sulbiye kızı Ayşe’ye ve babası Mustafa b. Abdullah’a münhasıra olup ba‘dehu mezbûre Ayşe dahi vefât edip verâseti vâlidesi mezbûre Şahbaz’a ve cedd-i sahîh mezbûr Mustafa’ya münhasıra ve tashîh-i mes’elesi iki yüz on altı sehimden olup sihâm-ı mezbûreden seksen yedisi mezbûr Mustafa’ya ve yüz yirmi dokuz[u] mezbûre Şahbaz’a isâbet eylediği şer‘an sâbit oldukdan sonra Mustafa cünûn-ı mutbık ile mecnûn olmağın tesviye-i umûruna kıbel-i şer‘den mansûb vasîsi olan Cafer Beşe b. Abdullah nâm kimesne ile mezbûre Şahbaz meclis-i şer‘-i şerîfde mahalle-i mezbûrede sâkin iken bundan akdem hâlik olan Hırisori nâm zimmînin zevcesi olup sulbî sagīr oğlu Kostanti’nin vasîsi olmağla terekesine vâzı‘atü’l-yed Ansice bt. Dimitri nâm Nasrâniye muvâcehesinde her biri ikrâr ve takrîr-i kelâm edip müteveffâ-yı mezbûr el-Hâc Hüseyin’in hâlik-i mezbûr Hırisori zimmetinde cihet-i deyn-i şer‘îden yetmiş guruş hakkı olup meblağ-ı mezbûrun otuz guruşunu mezbûr el-Hâc Hüseyin hayâtında ahz u kabz edip kırk guruşu mezbûr Hırisori zimmetinde bâkī kaldığından sonra ikisin dahi fevt olmağla bundan akdem meblağ-ı bâkī-i mezbûr hâlik-i mezbûr Hırisori’nin terekesine vâzı‘atü’l-yed olan mezbûre Ansice’den taleb ve da‘vâ ettiğimizde, ol dahi cevâbında hâlik-i mezbûr meblağ-ı bâkī-i mezbûru dahi müteveffâ-yı mezbûr el-Hâc Hüseyin’e edâ ve teslîmetmiş idi deyû def‘ ile mukābele edip lâkin isbât edemeyip sulh sagīr-i mezbûr hakkında dahi enfa‘ olmağla muslihûn tavassut edip mezbûre Ansice ile beynimizde yirmi üç guruş üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezbûr yirmi üç guruşu mezbûre Ansice yedinden ahz u kabz eyledik. Min ba‘d husûs-ı mezbûreye müte‘allika mezbûre Ansice ve sagīr-i mezbûr ile nizâ‘ ve medhalimiz kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilevvel li sene seb‘a ve semânîn ve elf. Şuhûdü’l-hâl: Osman b. Ömer, Ebûbekir b. Hüseyin, İbrahim Çelebi b. Ahmed, Veli Beşe b. Mahmud, Hasan Efendi b. Abdullah ve gayruhüm.