İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 305 Hüküm no: 283 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu Mehmed Ağa yağhânesini işleten Preşkova v. Vasil’in Mehmed Dede b. İbrahim aleyhine açtığı davada haksız olduğu Mahrûse-i Üsküdar’da Solak Sinan mahallesinde mumcu Mehmed Ağa’nın yağhânesinde müste’cir olan Preşkova v. Vasil nâm zimmî meclis-i şer‘-i şerîfde merhûm ve mağfûrun-leh Üsküdârî Şeyh Mahmud -el-vâsılu ilâ rahmeti rabbihi’l-Vedûd-hazretlerinin kerîmeleri ve evkāfına meşrûtiyyet üzre mütevelliye olan mefharü’s-sâlihât Fâtıma Hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Ahmed Efendi b. Eyyûb ve Şaban Çelebi b. Mahmud nâm kimesneler şehâdetleri ile şer‘an sâbit olan Mehmed Dede b. İbrahim nâm kimesne mahzarında üzerine da‘vâ ve takrîr-i kelâm edip merkūm Mehmed Dede zikr olunan yağhânenin sâbıkan mâliki olan Korucubaşı oğlu Ahmed Ağa nâm kimesneden zikr olunan yağhâneyi bin yetmiş dokuz senesinde bi tarîki’l-istiğlâl mâl-ı vakf-ı mezbûr ile semen-i ma‘lûma iştirâ ve tesellüm ettiğimden sonra ba‘de’t-tahliyyeti’ş-şer‘iyye ve’t-takābuzi’l-mer‘î senede on dört bin akçeye merkūm Ahmed Ağa’ya îcâr ve teslîm ol dahi istîcâr ve tesellüm etmekle zikr olunan yağhânenin yedi aylık ücretinden sekiz bin yüz elli akçe bâkī kalmış idi deyû meblağ-ı mezbûru benden fuzûlen ahz u kabz etmekle hâlâ merkūm Mehmed Dede’ye yağhâneye vech-i muharrer üzre ba‘de’l-istiğlâl taraf-ı vakf-ı mezbûrdan mezbûr Ahmed Ağa’nın taht-ı icâresinden olup ve müdde‘î-i mezbûr merkūm Ahmed Ağa’nın zikr olunan yağhânesinde müste’ciri olup ve merkūm Ahmed Ağa dahi zikr olunan yağhâneyi sene-i mezbûrede ba‘de fekki’r-rehin mezbûr Mehmed Ağa’ya bey‘ ve teslîm ettiğinde, zimmetinde zikr olunan yağhâne ücretinden vakf-ı mezbûra beş bin akçe deyni olmağla meblağ-ı mezbûr beş bin akçe için beni mezbûr Ahmed Ağa müdde‘î-i mezbûr Preşkova üzerine havâle-i sahîha-i şer‘iyye ile havâle edip mezbûr Preşkova dahi rızâsıyla havâle-i mezbûreyi kabûl etmekle yedinden ancak meblağ-ı mezbûr beş bin akçeyi ahz etmiş idim deyû müdde‘î-i mezbûru ba‘zı müdde‘âsında def‘ ile mukābele ve ziyâde bin yüz elli akçe kabzını inkâr etmeğin evvelâ mezbûr Mehmed Dede’den def‘-i mezbûru mübeyyine beyyine taleb olundukda merkūmân Ahmed Efendi ve Şaban Çelebi li ecli’ş-şehâde meclis-i şer‘a hâzırân olup istişhâd olunduklarında fi’l-hakīka zikr olunan yağhâne vech-i muharrer üzre ba‘de’l-istiğlâl taraf-ı vakf-ı mezbûrdan mezbûr Ahmed Ağa’nın taht-ı icrâsında olup ve müdde‘î-i mezbûr merkūm Ahmed Ağa’nın zikr olunan yağhânesinde müste’ciri olup ve merkūm Ahmed Ağa dahi zikr olunan yağhâneyi sene-i mezbûrede ba‘de fekki’r-rehin mezbûr Mehmed Ağa’ya bey‘ ve teslîm ettiğinde, zimmetinde zikr olunan yağhâne ücretinden vakf-ı mezbûre beş bin akçe deyni olmağla meblağ-ı mezbûr beş bin akçe için merkūm Mehmed Dede’yi müdde‘î-i mezbûr Preşkova üzerine bizim huzûrumuzda havâle-i sahîha-i şer‘iyye ile havâle edip mezbûr Preşkova dahi rızâsıyla havâle-i mezbûreyi kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup ve müdde‘î-i mezbûrdan ziyâde da‘vâsıyçün beyyine taleb olundukda ityân-ı beyyineden izhâr-ı acz ile istihlâf etmeğin merkūm Mehmed Dede’ye müdde‘î-i mezbûr yedinden ziyâde meblağ-ı mezbûr üç bin yüz elli akçesini dahi ber vech-i muharrer ahz u kabz etmeyip üzerine red ve damândan bir nesne lâzım olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fî selhi Saferi’l-hayr li sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemaleddin Kethüdâ-yı Hazret-i Efendi, Fahrü’l-akrân Hüseyin Ağa b. Üveys, Musa Halîfe b. Receb, el-Hâc Kasım b. Receb gayruhüm mine’l-hâzırîn.