İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 310 Hüküm no: 290 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Himmet’in eşi Mehmed b. Mustafa’dan muhâla‘a yoluyla boşandığı Mahrûse-i Galata müzâfâtından kasaba-i Kasımpaşa’da Silivri Câmi‘i mahallesi sâkinelerinden olup zâtı ma‘rifet-i şer‘iyye ile ârifân mahmiye-i İstanbul’da Kefeli mahallesi sükkânından İmâm Ahmed Efendi [b.] Mehmed ve Mehmed b. Mustafa nâm kimesneler ta‘rîfleri ile mu‘arrefe olan Ayşe bt. Himmet nâm hâtun meclis-i şer‘de, zevc-i dâhili bâ‘is-i hâze’l-kitâb Mehmed b. Mustafa nâm kimesne mahzarında ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun-aleyh olan [74a] bin akçe mehr-i müeccel ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr Mehmed ile muhâla‘a-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete ve gayra müte‘allika âmme-i de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mezbûre Ayşe Hâtun’un li ebeveyn kız karındaşı işbu hâzıre bi’l-meclis Rahime nâm hâtun meclis-i şer‘de, mezbûr Mehmed mahzarında ikrâr ve takrîr-i kelâm edip ben dahi târih-i kitâba gelince beynimizde cereyân eden ahz ve i‘tâ ve mu‘âmelât-ı şettâya müte‘allika cemî‘ de‘âvîden mezbûr Mehmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Efendi b. Mehmed, İbrahim b. ( ), Ahmed b. Muharrem, İbrahim Çelebi b. ( ), Osman Beşe b. Ömer, Ebûbekir b. Hüseyin, İsmail Çelebi b. Hasan ve gayruhüm mine’l-hâzırîn.