İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 315 Hüküm no: 296 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Hüseyin’in Sapanca’daki çiftliğini, tarlalarını ve koruyu Şeyh Mustafa Efendi b. Yusuf’a sattığı Dârü’l-hilâfeti’l-aliyye Kostantıniyye el-mahmiye ma[ha]llâtından Kalenderhâne mahallesi sâkinlerinden umdetü’l-a‘yân ve’l-eşbâh Ali Ağa b. Hüseyin tarafından husûs-ı âti’l-beyâna vekîl olduğu mahalle-i mezbûre sükkânından el-Hâc Abdullah b. el-Hâc Mustafa ve Hazînedârı Mustafa Bey b. Abdullah ve Mehmed b. Mustafa nâm kimesneler şehâdetleri ile şer‘an sâbit olan el-Hâc Selim Ağa b. Osman nâm kimesne meclis-i şer‘-i şerîf ve mahfil-i dîn-i münîfde, hâlâ Mesih Paşa câmi‘i şerîfi’nde vâ‘iz olan umdetü’l-meşâyihi’l-izâm Mustafa Efendi b. Yusuf Efendi mahzarında ikrâr ve takrîr-i kelâm edip müvekkil-i mûmâ-ileyh Ali Ağa akd-i âti’z-zikrin sudûruna değin silk-i mülkünde münselik olup vilâyet-i Anadolu’da Sapanca kazâsına tâbi‘ Karacakışlak nâm mevzi‘de vâki‘ lede’l-ahâlî ve’l-cîrân ma‘lûmü’l-hudûd üç ahır ve iki samanhâne ve doksan keyl der anbar buğday ve elli keyl arpa ve bir müd darı ve bir müd kaplıca ve üç anbar ve üç ahır ve fırını müştemil çiftlik ta‘bîr olunur mülk menzilini ve ma‘lûmü’l-hudûd bir kıt‘a elma bahçesini ve menzil-i mezbûr içinde mevcûd elli çift kara sığır öküzü ve beş re’s su sığırı öküzü ve sekiz re’s kara sığır ineği ve beş re’s su sığır ineği ve iki malak ve beş re’s düve ve tosun ve bir kara sığır boğası ve bir su sığırı boğası ve on arı kovanı ve iki kebîr kazgan ve üç sed tavası ve dört bakraç ve iki kebîr sahan ve iki tencere ve bir tepsi ve bir ibrik ve sâir bakır evânî ve evsâfı beynimizde ma‘lûm Rûsiyyü’l-asl Kenan nâm bir gulâm ve üç kilim ve üç yastık ve sekiz saban demiri ve iki cedîd araba ve beynimizde ma‘lûm araba âlâtı ve dört döğen ve sâir âlât-ı hırâset ve zirâ‘ati ve zikri âtî tarlalarda nâbit olup alâimi zâhir olan beynimizde ma‘lûm mahsûlâtı bi safkatin vâhidetin altmış bin akçeye müvekkil-i mezbûr Ali Ağa mûmâ-ileyh eş-Şeyh Mustafa Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı kat‘î ile bey‘ ve taht-ı tasarrufunda olup zikr olunan çiftliğe teba‘iyyet ile zirâ‘at olunur mevzi‘-i mezbûrda vâki‘ bir tarafdan Beşköprü demekle meşhûr köprü ve bir tarafdan Arslanpınarı çeşmesi ve bir tarafdan Kartal Döneği nâm mahal ve bir tarafdan Kara Abdiler nâm karye ve bir tarafdan Demirciler Yurdu sınırı ve bir tarafdan tarîk-i âm ile mahdûd ve tahmînen bin keyl-i İstanbulî tohum istî‘âb eder on dört kıt‘a tarlalarını ve hudûd-ı mezkûr dâhilinde vâki‘ koru ve cebel ve iki kıt‘a çayırı sekiz bin akçe bedel mukābelesinde ma‘rifet-i sâhib-i arz ile ferâğ ve tefvîz edip mûmâ-ileyh eş-Şeyh Mustafa Efendi dahi emlâk-i mezbûreyi ber vech-i muharrer iştirâ ve tesellüm ve zikr olunan tarlaları ve koruyu ve cebeli ve iki kıt‘a çayırı tefevvüz? ve kabûl ettiğinden sonra semen-i mezbûr altmış bin akçe ve bedel-i mezkûr on sekiz bin akçe ki cem‘an yetmiş bin akçe müvekkil-i mezbûr Ağa’ya edâ ve teslîm ol dahi yedinden tamâmen ahz u kabz ettiğinden sonra zikr olunan emlâki ve tarlaları ve koru ve cebeli ve iki kıt‘a çayırı mahallelerinde zabt ve tasarrufa mûmâ-ileyh eş-Şeyh Mustafa’yı taslît eyledi dedikde mûmâ-ileyh eş-Şeyh Mustafa Efendi dahi mukırr-ı merkūmu cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene seb‘a ve semânîn ve elf. Şuhûdü’l-hâl: Hanefi Efendi b. Receb, Veli Beşe b. Mustafa, Ahmed Çelebi el-Müezzin bi câmi‘-i Bâli Paşa, Hasan Çelebi b. el-Hâc Mehmed, el-Hâc Ahmed b. Hasan, el-Hâc Mehmed b. Ahmed, Mehmed b. Mustafa, Ebûbekir b. Hüseyin, el-Hâc Mehmed b. Kaya Mehmed Ağa kethüdâ-yı muhzırân.