İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 316 Hüküm no: 297 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Yusuf’un menzilini Sâime bt. Abdullah’a sattığı Mahmiye-i İstanbul’da Kâtib Muslihiddin mahallesi sâkinlerinden Mustafa Çelebi b. Yusuf nâm kimesne meclis-i şer‘-i şerîfde bâ‘is-i hâze’l-kitâb Sâime bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân İbrahim Çelebi b. Hasan ve Mehmed Çelebi b. Ahmed nâm kimesneler şehâdetleri ile şer‘an sâbit olan Hüseyin Beşe b. Receb nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahmiye-i mezbûrede Molla Ahaveyn mahallesinde vâki‘ bir tarafdan ba‘zan Fâtıma Hâtun ve ba‘zan Ayşe Hâtun mülkleri ve bir tarafdan İbrahim Çelebi mülkü ve bir tarafdan Abdülbâkī vakfı ve bir tarafdan tarîk-i âm ile mahdûd bir bâb fevkānî ve iki bâb tahtânî oda ve bir sofa ve altında mahzen ve kenîf ve su kuyusu ve cüneyneyi müştemil menzilimi, cümle tevâbi‘ ve levâhık ve kâffe-i hukūk ve merâfıkı ile müvekkil-i mezbûre Sâime Hâtun tarafından îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yirmi altı bin iki yüz akçeye bey‘ ve teslîm ol dahi iştirâ ve tesellüm ve kabz ettiğinden sonra semeni olan meblağ-ı mezbûr yirmi altı bin iki yüz akçeyi müvekkile-i mezbûre Sâime Hâtun yedinden tamâmen ahz u kabz eyledim. Min ba‘d menzil-i mahdûd-ı mezbûr müvekkile-i mezbûrenin mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Şâhin Ağa b. Abdullah, Ahmed Efendi b. Ali el-İmâm, Mustafa Halîfe el-Müezzin, İbrahim Çelebi b. Hakkı, Mehmed Çelebi b. Ahmed.