İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 317 Hüküm no: 298 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Hüseyin Beşe b. Abdullah ile ortağı Yani v. Yorgi’nin sattıkları et bedelinden Ali b. Abdullah’ta alacakları olduğu Mahmiye-i İstanbul’da Küçük Karaman’da kasab tâ’ifesinden Hüseyin Beşe b. Abdullah ve şerîki Yani v. Yorgi nâm kimesneler meclis-i şer‘de, Ali b. Abdullah nâm kimesne mahzarında üzerine da‘vâ ve takrîr-i kelâm edip bundan akdem mezbûr Ali kanadarımız olup bey‘ eylediği koyun ve kuzu eti semeninden zimmetinde bir def‘a bin üç yüz sekiz akçe ve bir def‘a dahi iki bin üç yüz seksen altı akçe min haysi’l-mecmû‘ mezbûr Ali zimmetinde üç bin altı yüz doksan altı akçe hakkımız olup mezbûr Ali’den taleb eylediğimizde vermekden imtinâ‘ eder alıverilmesi matlûbumuzdur dedikde gıbbe’s-suâl mezbûr Ali cevâbında fi’l-hakīka müdde‘iyân-ı mezbûrân Hüseyin Beşe ve Yani’nin kanadarları bey‘ eylediği koyun ve kuzu semeninden ber vech-i muharrer zimmetinde vâcibü’l-edâ ve lâzımü’l-kazâ müdde‘iyân-ı mezbûrâna cem‘an üç bin altı yüz doksan altı akçe deyni olduğunu bi tav‘ihî ikrâr ve i‘tirâf etmeğin mûcebince meblağ-ı mezbûr üç bin altı yüz doksan altı akçeyi müdde‘iyân-ı mezbûrân Hüseyin Beşe ve Yani’ye edâ ve teslîme merkūm Ali’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Abdullah Efendi el-kâtib, Veli Beşe b. ( ) ve gayruhüm.