İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 317 Hüküm no: 299 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud b. Ahmed menzilini eşi Gülistan ile Ahmed b. Muharrem’e sattığı Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Hüseyin Efendi b. Himmet irsâl olunup ol dahi Davud b. Ahmed nâm kimesnenin mahmiye-i İstanbul’da Nişâncı Cafer Çelebi mahallesinde sâkin olduğu menzile varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde merkūm Davud meclis-i ma‘kūd-ı mezbûrda işbu bâ‘isü’l-kitâb el-Hâc Ahmed b. Muharrem nâm kimesne ile kendi zevcesi Gülistan nâm hâtun mahzarlarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup ancak ism-i mâl ıtlâk olunur mahalle-i mezbûrede vâki‘ bir tarafdan Medîne-i Münevvere vakfı olan menzil ve bir tarafdan mezbûr el-Hâc Ahmed menzili ve iki tarafdan tarîk-i âm ile mahdûd olup tahtânî bir bâb oda ve bir sagīr sofa ve muhavvata ve bi’r[-i mâ]yı müştemil olan menzilimi, bi cümleti’t-tevâbi‘ ve’l-levâhık mezbûr el-Hâc Ahmed ile zevcem mezbûre Gülistan’a tarafeynden îcâb ve kabûlü hâvî bey‘-i bâtt-ı sahîh-i şer‘î ile on bin akçeye bey‘ ve teslîm anlar dahi ale’l-iştirâki’s-seviy iştirâ ve tesellüm eylediklerinden sonra menzil-i mezbûrun semeni olan meblağ-ı mezbûr on bin akçeyi mezbûrân yedlerinden bi’t-tamâm ahz u kabz eylediğimden sonra semen-i mezbûrun beş bin akçesini merkūm el-Hâc Ahmed’e ve beş bin akçesini zevcem mezbûre Gülistan şurûtdan ârî hibe-i sahîha-i şer‘iyye ile hibe ve teslîm anlar dahi meclis-i hibede ittihâb ve kabz ve kabûl ve tesellüm eyledi ba‘de’l-yevm semen-i mezbûrda ve menzil-i merkūmda alâka ve medhalim kalmayıp mezbûr el-Hâc Ahmed ile zevcem mezbûre Gülistan’ın ale’l-iştirâki’s-seviy mülk-i müşterâları olmuşdur. Keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’ş-şer‘î husûs-ı mezbûru Mevlânâ-yı merkūm mahallinde tahrîr ve ma‘an irsâl olunan Mehmed b. Abdullah nâm kimesne ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Rebî‘ilevvel li sene seb‘a ve semânîn ve elf. Şuhûdü’l-hâl: Receb Kethüdâ b. Ali, Ahmed b. Mustafa, Mehmed Çelebi b. Mehmed, Abdülfettâh b. Himmet?, Şâhin? b. Abdullah ve gayruhüm.