İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 318 Hüküm no: 300 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ali Halîfe’nin eşi Hasan Çelebi b. Abdünnebi’den muhâla‘a yoluyla boşandığı Mahmiye-i İstanbul’da Hoca Üveys mahallesi sâkinelerinden Ayşe nâm hâtunun babası tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân mahalle-i mezbûre sükkânından el-Hâc Ali b. Mustafa ve Sinan b. Abdullah nâm kimesneler şehâdetleri ile şer‘an sâbit olan Ali Halîfe b. Hüseyin nâm kimesne meclis-i şer‘de, müvekkilem mezbûrenin zevc-i dâhili bâ‘is-i hâze’l-kitâb Hasan Çelebi b. Abdünnebi mahzarında bi’l-vekâle ikrâr ve takrîr-i kelâm edip müvekkilem mezbûrenin zevci mezbûr Hasan Çelebi zimmetinde mütekarrir ve ma‘kūdun-aleyh olan üç bin akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre ve mezbûr Hasan Çelebi’nin firâşından hâsıl hamli dahi hayyen zuhûr ederse yedi yaşını tekmîli edinceye değin kendi malından intifâk [infâk] ve iksâ etmek üzre mezbûr Hasan Çelebi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûru kabûl ettiğinden sonra hukūk-ı zevciyyete müte‘allika âmme-i de‘âvâdan her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eylediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Çavuş b. Abdullah el-Mübâşir, İbrahim Çelebi b. Ahmed, Osman Beşe b. Ömer, Kara Mustafa b. Şaban, Ebûbekir Çelebi b. Hüseyin ve İbrahim Beşe b. Ali ve Mehmed Çelebi b. Mehmed ve gayruhüm.