İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 325 Hüküm no: 310 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kuyumcu Çil Mehmed Beşe b. Abdullah’ın terekesinin eşleri Ayşe ve Hatice ile vârisi amca oğlu el-Hâc İbrahim’e ait olduğu Dergâh-ı âlî yeniçerilerinden otuzuncu bölüğüne mahsûs oda ahâlîsinden Odabaşı el-Hâc İbrahim Beşe b. Abdullah nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda, mahmiye-i İstanbul’da Langa kurbunda Şeyh Ferhad mahallesi sâkinlerinden iken bin seksen iki senesinde vefât eden kuyumcu Çil Mehmed Beşe b. Abdullah nâm kimesnenin zevceteyn-i metrûketeyni Ayşe bt. Abdullah ve Fâtıma bt. Abdullah nâm hâtunlardan gayrı mevcûd vârisi olmamağla, terekesinin rub‘u irsen mezbûretân Ayşe ve Fâtıma’ya isâbet edip ve selâse-i erbâ‘ı beytülmâle âid olmağla mahmiye-i mezbûrede sene-i mezbûrede yeniçeri beytülmâli nâzırı olmağla müteveffâ-yı mezbûrun terekesinin selâse-i erbâ‘ını kabz eden Hüseyin Ağa b. Receb nâm kimesne mahzarında üzerine da‘vâ ve takrîr-i kelâm edip ben müteveffâ-yı mezbûre Çil Mehmed Beşe’nin li ebeveyn ammisi oğlu olup hattâ mezbûr Mehmed Beşe hayâtında kirâren ve mirâren şuhûd mahzarında benim için el-Hâc İbrahim Beşe li ebeveyn ammim oğlu ve vârisimdir deyû ikrâr ve i‘tirâf edip ben dahi tasdîk ettiğimden sonra mezbûr Mehmed Beşe musırran vefât edip ben ber vech-i muharrer mukırrun-leh bi’n-neseb cihetinden müteveffâ-yı mezbûr Mehmed Beşe’nin vârisi olup verâseti bana ve zevceteyni mezbûretân Ayşe ve Fâtıma’ya münhasıra olup ve mezbûr Hüseyin Ağa müteveffâ-yı mezbûrun terekesinin selâse-i erbâ‘ını kabz etmekle hâlâ merkūm Hüseyin Ağa’ya suâl olunup müteveffâ-yı mezbûrun terekesinden ber vech-i muharrer makbûzunu bana def‘ ve teslîme tenbîh olunmak matlûbumdur dedikde gıbbe’s-suâl mezbûr Hüseyin Ağa cevâbında müteveffâ-yı mezbûr Mehmed Beşe’nin terekesinin selâse-i erbâ‘ını ber vech-i muharrer kabz ettiğini ikrâr, lâkin müdde‘î-i mezbûrun vech-i muharrer üzre verâsetini inkâr etmeğin müdde‘î-i mezbûrdan ber vech-i muharrer verâsetine beyyine taleb olundukda mahalle-i mezbûre ahâlîsinden İmâm Halil Efendi b. İbrahim ve Müezzin Osman Halîfe b. Ahmed ve Pazarcı Mustafa b. Ali ve berber İbrahim b. Mehmed ve el-Hâc Mehmed b. Ahmed ve Mustafa b. Abdullah [ve] İbrahim Bey b. Yusuf ve İbrahim Paşa mahallesinden kuyumcu İbrahim Beşe b. Abdullah ve Hüseyin Ağa mahallesi sükkânından kazgancı el-Hâc Mustafa Beşe b. Abdullah ve Attâr Ahmed b. Veli ve Kızıltaş mahallesi sükkânından kazgancı el-Hâc Süleyman b. Murad ve Sâlih Çelebi b. Mustafa ve Ahmed b. Yusuf ve Süleyman b. Ali ve kalaycı Menteş b. Şükrullah nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr kuyumcu Çil Mehmed Beşe hayâtında kirâren ve mirâren müdde‘î-i mezbûr el-Hâc İbrahim Beşe için li ebeveyn ammim oğludur ve vârisimdir deyû bizim huzûrumuzda ikrâr ve i‘tirâf edip mezbûr el-Hâc İbrahim Beşe dahi tasdîk ettiğinden sonra mezbûr Mehmed Beşe musırran vefât edip verâseti zevceteyni mezbûretân Ayşe ve Fâtıma ile ber vech-i muharrer mukırrun-leh bi’n-neseb cihetinden müdde‘î-i mezbûr el-Hâc İbrahim Beşe’ye münhasıradır gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl şehâdetleri makbûle olmağın mûcebince müdde‘î-i mezbûr el-Hâc İbrahim Beşe’nin ber vech-i muharrer [80a] verâseti ba‘de’l-hükmi’ş-şer‘î müteveffâ-yı mezbûrun terekesinden merkūm Hüseyin Ağa ber vech-i muharrer makbûzu olan selâse-i erbâ‘ını müdde‘î-i mezbûr el-Hâc İbrahim Beşe’ye def‘ ve teslîme merkūm Hüseyin Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Umdetü erbâbü’t-tahrîr ve’l-kalem Hasan Efendi, Mehmed Çelebi kethüdâ-yı muhzırân, kıdvetü ashâbü’t-tastîr ve’r-rakam Yusuf Efendi, el-Hâc Kemaleddin, el-Hâc Mehmed b. Receb, kıdvetü’l-akrân ve’l-emâsil Mehmed Çelebi b. Murad Ağa muhzırbaşı, Mefharü’l-emâsil ve’l-eşbâh Kasım Ağa.