İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 328 Hüküm no: 312 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İbrahim b. Mehmed’in verasetinin paylaşımında Emine bt. İbrahim’in babasından intikal eden evin hissesini annesi Fâtıma Hâtun’a devrettiği Mahmiye-i İstanbul’da Keçeci Pîrî mahallesinde sâkin iken bundan akdem vefât eden İbrahim b. Mehmed’in verâseti zevce-i metrûkesi Fâtıma bt. Abdullah ile sulbiye sagīre kızı Ayşe dahi vefât edip verâseti vâlidesi mezbûre Fâtıma’ya ve li üm kız karındaşı Emine’ye? ve li ebeveyn ammi oğulları Mehmed ve Ahmed ve diğer Mehmed’e münhasıra ve bi tarîki’l-münâsahati’ş-şer‘iyye tashîh-i mes’eleleri kırk sekiz sehimden olup sihâm-ı mezbûreden on dört sehimi mezbûre Fâtıma’ya ve on sekiz sehimi mezbûre Emine Hâtun’a ve üçer sehimi mezbûrûn Mehmed ve Osman ve Ahmed ve diğer Mehmed’den her birine isâbet eylediği şer‘an zâhir ve mütehakkik oldukdan sonra mezbûre Emine Hâtun tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre şer‘an sâbit olan Bayram Efendi b. Receb nâm kimesne meclis-i şer‘-i şerîfde bâ‘isetü hâzihi’l-vesîka mezbûre Fâtıma Hâtun mahzarında bi’l-vekâle ikrâr ve takrîr-i kelâm edip müteveffâ-yı mezbûr İbrahim’in terekesinden olup mahalle-i mezbûrda vâki‘ bir tarafdan Hasan Beşe b. Abdullah mülkü ve bir tarafdan Ayşe Hâtun mülkü ve bir tarafdan tarîk-i âm ile mahdûd ve tahtânî iki bâb oda ve bir sofa ve bir bi’r-i mâ ve bir kenîf ve eşcâr-ı müsmire ve gayr-ı müsmireyi müştemil mülk menzilden ber vech-i muharrer müvekkilem mezbûre Emine Hâtun’a isâbet eden on sekiz sehim hisse-i şâyi‘asını yedi bin beş yüz akçeye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Fâtıma Hâtun’a bi’l-vekâle bey‘ ve teslîm ol dahi minvâl-i muharrer üzre iştirâ ve kabûl ve tesellüm eylediğinden sonra semeni olan meblağ-ı mezbûr yedi bin beş yüz akçeyi mezbûre Fâtıma Hâtun’un tarafından vekîli olan işbu hâzır bi’l-meclis Osman b. Mehmed nâm kimesne yedinden bi’l-vekâle tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Ahmed Efendi b. Ramazan, Mehmed Beşe b. Mehmed, Mehmed Çelebi el-Müezzin, Mustafa Halîfe el-Kayyım, Osman Bey b. Mehmed, Mustafa Beşe b. Receb, Mehmed Bey b. Receb