İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 333 Hüküm no: 318 Orijinal metin no: [82a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın vakıf şartnamesini değiştirdiği Mahmiye-i İstanbul’da Molla Ahaveyn mahallesi sâkinelerinden olup zâtı ma‘rifet-i şer‘iyye ile ârifân Hüseyin Efendi b. Yusuf ve Mustafa Efendi b. Ahmed nâm kimesneler ta‘rîfleri ile mu‘arrefe olan Belkıs bt. Abdullah nâm hâtun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip silk-i mülkünde münselik olup mahalle-i mezbûrda vâki‘ bir tarafdan ba‘zan Rahime Hâtun mülkü ve ba‘zan Sâime Hâtun mülkü ve bir tarafdan merhûm Ramazan Efendi mülkleri ve bir tarafdan Kâtib Ahmed Efendi mülkü ve bir tarafdan tarîk-i âm ile mahdûd dört bâb fevkānî oda ve bir sofa ve bir tahtapûş ve iki bâb tahtânî oda ve cüneyne ve Ramazan Efendi veresesi ile müşterek bir su kuyusu ve kenîf ve bir mikdâr havluyu müştemil menzilimi, işbu vakfiye-i ma‘mûlün-bihâm nâtıka olduğu üzre bin yetmiş dokuz senesi şehri Ramazan-ı şerîfi’nin yirmi dokuzuncu gününde vakf-ı sahîh-i şer‘î ile vakf ve haps ettiğimden sonra şöyle şartetmiş idim, mâdâm ki hayâtda olam ben kendim mutasarrıfe olam, bi emrillâhi te‘âlâ vefâtımdan sonra evlâd ve evlâd-ı evlâdım ve evlâd-ı evlâdım mutasarrıf olalar anlardan sonra zevcim Sefer nâm kimesne mutasarrıf ola, ba‘de vefâtihî anın dahi evlâdı ve evlâd ve evlâdı ve evlâd ve evlâd-ı evlâdı mutasarrıf olalar. Anlardan sonra oğlum İsâ b. Mehmed nâm kimesne mutasarrıf ola ba‘de vefâtihî anın dahi evlâdı ve evlâd-ı evlâdı ve evlâd-ı evlâd-ı evlâdı mutasarrıf olalar. Ve ba‘de vefâtihim hasbe’l-âde icâre-i şer‘iyye ile îcâr olunup ücretinden hâsıl olan nemâsı mahalle-i mezbûre avârızına verile ve menzil-i mezbûrun ta‘mîr ve termîmi mutasarrıf olanlar üzerlerine ola deyû şart ve ta‘yîn ve teslîm-i mütevellî ve tescîl-i şer‘î ettirmiş idim lâkin vakf-ı mezbûrumun tebdîl ve tağyîrini merreten ba‘de uhrâ yedimde kalmağla hâlâ vech-i meşrûh üzre ettiğim şart ve ta‘yînimden rücû‘ edip şöyle şart eyledim ki vakf-ı mezbûrumu ben hayâtda oldukda mütevelliye olup menzil-i mahdûd-ı mezkûru icâre-i mu‘accele ve yevmî bir akçe ücret-i müeccele ile bi’t-tevliyye âhara îcâr ve mu‘accelesini nafaka ve kisveye eşedd-i ihtiyâc ile muhtâc olup ve ism-i mâl ıtlâk olunur bir nesnem olmamağın kendi mesârifime sarf edip müeccelesi olan yevmî bir akçe ücretine hayâtında oldukça mutasarrıfe olam bi emrillâhi te‘âlâ vefâtımdan [82b] sonra menzil-i mahdûd-ı mezkûrun icâre-i müeccelesi olan yevmî bir akçe mahalle-i mezbûre avârızına verile ve vaktâ ki kazâ-i nahb ve likā-i Rab edem mahalle-i mezbûre avârızına mütevellî olanlar vakf-ı mezbûrumu dahi hasbî mütevellî olalar deyû şart ve ta‘yîn eyledim hâlâ yedimde olan vakfiyeme nazar olunup vech-i muharrer üzre eylediğim işbu şart ile amel olunmak üzre kıbel-i şer‘den vesîka tahrîr olunmak matlûbumdur deyû ibrâz eylediği vakfiye-i ma‘mûlün-bihâsında fi’l-hakīka vakf-ı mezbûrunun tebdîl ve tağyîri merreten ba‘de uhrâ yedinde olduğu mastûr ve mukayyed bulunmağın ba‘de’l-yevm işbu şart ile amel olunmak üzre taraf-ı şer‘den bu vesîka ketb ü tahrîr olundu. Fi’l-yevmi’s-sâlis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hüseyin Efendi b. Yunus, Mustafa Efendi b. Ahmed el-Müezzin, Receb Beşe b. Mustafa, Ahmed Efendi b. Ali el-İmâm, İbrahim Bey b. Hasan, Hasan Çelebi b. Ebûbekir, Ebûbekir b. Hasan, İbrahim b. Ahmed, el-Hâc Ahmed Efendi b. Abdullah.