İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 335 Hüküm no: 320 Orijinal metin no: [82b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Ahmed’in değirmen, bahçe ve bağlarını Mehmed Ağa b. Abdullah’a sattığı Vilâyet-i Rumeli’nde Vize kazâsına tâbi‘ Sergen nâm karye ahâlîsinden olup misâfiren mahmiye-i İstanbul’da Küçük Karaman’da Nakib hanı’nda sâkin Mehmed Ağa b. Ahmed nâm kimesne meclis-i şer‘-i şerîfde sâhib hâze’l-kitâb Mehmed Ağa b. Abdullah nâm kimesne mahzarında ikrâr ve takrîr-i kelâm edip mahrûse-i Galata müzâfâtından Marmara nâhiyesine tâbi‘ Elvine nâm karye ahâlîsinden işbu hâzır bi’l-meclis Yorgi v. Yani nâm zimmîden iştirâ ve kabz etmekle yedimde mülk ve hakkım olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb yel değirmenimi ve yine karye-i mezbûrede Sanur nâm mevzi‘de vâki‘ bir tarafdan Verasemi bağı ve bir tarafdan Galatanoş bağı ve bir tarafdan Yanaki bağı ve bir tarafdan tarîk-i âm ile mahdûd üç bin beş yüz çubuk bir kıt‘a bağı ve yine karye-i mezbûrede vâki‘ bir tarafdan Kostantin bağı ve iki tarafdan diğer Kostantin bağı ve bir tarafdan tarîk-i âm ile mahdûd zât-ı eşcâr-ı müsmire ve gayr-ı müsmire bir dönüm bir kıt‘a bahçemi ve yine karye-i mezbûrede Taşlık nâm mevzi‘de vâki‘ bir tarafdan Braş nâm zimmî bağı ve bir tarafdan Palaş bağı ve bir tarafdan diğer Kostantin bağı ve bir tarafdan tarîk-i âm ile mahdûd bin dört yüz çubuk bir kıt‘a bağımı ve yine karye-i mezbûrede Depe nâm mevzi‘de vâki‘ bir tarafdan Todori bağı ve bir tarafdan Dimitraki bağı ve bir tarafdan Yanaki bağı ve bir tarafdan tarîk-i âm ile mahdûd üç bin beş yüz çubuk bir kıt‘a bağımı ve yine karye-i mezbûrede Foka nâm mevzi‘de vâki‘ bir tarafdan Ahmed nâm kimesne bağı ve bir tarafdan Nikola bağı ve bir tarafdan Kostantin bağı ve bir tarafdan Yanaki bağı ile mahdûd altı bin çubuk bir kıt‘a bağımı ve yine karye-i mezbûrede vâki‘ Derekır nâm mevzi‘de vâki‘ bir [83a] tarafdan Todori tarlası ve bir tarafdan Mihal tarlası ve bir tarafdan Yorgaki bağı ve bir tarafdan tarîk-i âm ile mahdûd dokuz yüz çubuk bir kıt‘a bağımı ve yine karye-i mezbûrede Ayahorya nâm mevzi‘de vâki‘ bir tarafdan Bâli bağı ve bir tarafdan Yorgi bağı ve bir tarafdan Panayot tarlası ve bir tarafdan tarîk-i âm ile mahdûd iki bin çubuk bir kıt‘a bağımı, cümle tevâbi‘ ve levâhıkları ve kâffe-i hukūk-ı merâfıkları ile bi safkatin vâhide merkūm Mehmed Ağa’ya tarafeynden îcâb ve kabûlü hâvî bey‘-i kat‘î ile iki yüz seksen guruşa bey‘ ve temlîk, ol dahi iştirâ ve kabûl ettiğinden sonra semen-i mezbûr iki yüz seksen guruşu bana edâ ve teslîm ben dahi yedinden ahz u kabz edip zikr olunan değirmen ve bahçe ve bağları mahallerinde zabta merkūm Mehmed Ağa’yı taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Muttalibzâde, selam çavuşu Abdi Ağa, Silahdâr Mehmed Ağa b. Hüseyin, İçmehterbaşı Sâlih Ağa ve gayruhüm.