İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 336 Hüküm no: 322 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ali’nin vârislerinin Mustafa b. Mehmed’de olan alacak davasında sulh oldukları Mahmiye-i İstanbul’da Derviş Ali mahallesinde sâkin iken bundan akdem vefât eden Ali b. ( ) kimesnenin verâseti, zevce-i metrûkesi Ayşe bt. Abdullah nâm hâtun ile sulbî kebîr oğlu Hüseyin? ve sulbiye kebîre kızı Fâtıma’ya münhasıra olduğu şer‘an zâhir ve mütehakkik oldukdan sonra mezbûr Hüseyin kendi tarafından asâleten ve mezbûretân Ayşe ve Fâtıma taraflarından husûs-ı âti’l-beyâna vekîlleri olduğu Receb b. Abdullah ve Bayram b. Mustafa nâm kimesneler şehâdetleri ile şer‘an sâbit olup meclis-i şer‘-i şerîfde bâ‘is-i hâze’l-kitâb Mustafa b. Mehmed nâm kimesne mahzarında ikrâr ve takrîr-i kelâm edip bundan akdem mezbûr Mustafa ile babam müteveffâ Ali hayâtında canbâzlık san‘atında şerîkler olup mâl-ı şirket-i mezbûreden ba‘de küllî hesâb müteveffâ-yı mezbûrun mezbûr Mustafa zimmetinde on yedi guruş hakkı bâkī kalıp kable’l-ahz mezbûr Ali vefât etmekle ben dahi meblağ-ı bâkī-i mezbûru Mustafa’dan asâleten ve vekâleten taleb ve da‘vâ ettiğimde ol dahi inkâr etmeğin beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü aslihî muslihûn tavassut edip mezbûr Mustafa ile beynimizde dört guruş üzerine inşâ-i akd-i sulh ettiklerinde ben dahi sulh-ı mezbûru kabûl bedel-i sulh olan meblağ-ı mezbûr dört guruşu mezbûr Mustafa yedinden tamâmen ahz u kabz ettiğimden sonra husûs-ı mezbûre ve mâl-ı şirket-i mezbûreye müte‘allika da‘vâdan mezbûr Mustafa’nın zimmetini bi’l-asâle ve bi’l-vekâle ibrâ ve iskāt edip mezbûr Mustafa dahi bedel-i sulhiyye ve mâl-ı şirket-i mezbûreden kırk guruşa müte‘allik da‘vâdan bizim zimmetimizi ibrâ-i âmm-ı kātı‘ü’l-hısâm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilevvel li sene seb‘a ve semânîn ve elf. Şuhûdü’l-hâl: Receb b. Abdullah, Bayram b. Mustafa, Durmuş b. Ali, Ali b. Mustafa, Ali b. Bayram, Süleyman b. Mustafa, İbrahim Çelebi b. Ahmed ve gayruhüm.