İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 337 Hüküm no: 323 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ahmed’in muhâla‘a yoluyla boşandığı eşi Osman Beşe b. Ramazan’dan mehir ve nafaka hakkı olmadığı Mahrûse-i Galata müzâfâtından kasaba-i Kasımpaşa’da Sirkeci Muslihiddin mahallesinde sâkine Ayşe bt. Ahmed nâm hâtun zâtı ma‘rifet-i şer‘iyye ile ârifân Süleyman Beşe b. Ali ve Hüseyin b. Abdullah nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde zevc-i mutallıkı bâ‘is-i hâze’l-kitâb Osman Beşe b. Ramazan nâm kimesne mahzarında üzerine da‘vâ ve takrîr-i kelâm edip bundan akdem mezbûr Osman Beşe bin altı yüz akçe mehr-i müeccel ile beni tezevvüc ve duhûl ettiğinden sonra bin seksen altı senesi Zilka‘desi’nin on altıncı günü talâk-ı bâyin ile beni tatlîk edip mehr-i müeccelim olan meblağ-ı mezbûr merkūm Osman Beşe’nin zimmetinde kalmağın suâl olunup alıverilmesi matlûbumdur dedikde gıbbe’s-suâl mezbûr Osman Beşe cevâbında müdde‘iye-i mezbûre târih-i mezbûrda zimmetimde mütekarrir olan bin altı yüz akçe mehr-i müecceli ve nafaka-i iddet-i mu‘ayyene-i ma‘lûmesini üzerlerine ve me’ûnet-i süknâsı dahi kendi üzerine olmak üzre muhâla‘a-i sahîha-i şer‘iyye ile huzûr-ı müslimînde muhâla‘a edip ben dahi muhâla‘a-i mezbûreyi kabûletmiş idim deyû def‘ ile mukābele edicek gıbbe’l-istintâk ve’l-inkâr mezbûr Osman Beşe’den def‘-i mezbûru mübeyyine beyyine taleb olundukda mahalle-i mezbûre sükkânından Ali Çelebi b. Cafer ve Mustafa Beşe b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre bin seksen altı senesi Zilka‘desi’nin on altıncı günü zevci mezbûr Osman Beşe ile zimmetinde mütekarrir olan bin altı yüz akçe mehri ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre bizim huzûrumuzda muhâla‘a-i mezbûreyi kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-tezkiyye şehâdetleri makbûle olmağın mûcebince müdde‘iye-i mezbûre Ayşe vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilevvel li sene seb‘a ve semânîn ve elf. Şuhûdü’l-hâl: Süleyman Beşe b. Ali, Hüseyin b. Abdullah, İbrahim Çelebi b. Ahmed, Mehmed b. Ahmed, Hüseyin b. Mehmed, Mehmed b. Mehmed, Mehmed b. Mehmed, Süleyman b. Hüseyin ve gayruhüm.