İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 338 Hüküm no: 324 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ömer Ağa’nın evini müştemilatıyla Abdülbâki Efendi b. Abdülaziz’e sattığı Mahmiye-i İstanbul’da Kefeli mahallesi sâkinlerinden Mustafa Çelebi b. Ömer Ağa meclis-i şer‘-i şerîfde fahrü’l-kuzâti’l-müteşerri‘în bâ‘is-i hâze’l-kitâb Abdülbâkī Efendi b. Abdülaziz mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan ba‘zan Tüfenkçi Mehmed Çelebi mülkü ve ba‘zan Osman Efendi vakfı ve bir tarafdan Bayram Beşe tasarrufunda olan vakıf menzil ve bir tarafdan İsmail Efendi odaları ve bir tarafdan tarîk-i âm ile mahdûd dâhiliyyesinde, fevkānî ve tahtânî dört bâb ve cüneyne ve kenîf ve hâriciyyesinde, bir bâb fevkānî oda ve sofa ve bi’r-i mâ ve ahırı ve kenîfi müştemil menzilimi, bi cümleti’t-tevâbi‘ ve’l-levâhık merkūm Abdülbâkī Efendi’ye tarafeynden îcâb ve kabûlü hâvî bey‘-i kat‘î ile bin esedî guruşa bey‘ ve teslîm ol dahi iştirâ ve tesellüm ettiğinden sonra semen-i mezbûr bin esedî guruşu bana edâ ve teslîm ben dahi bi’t-tamâm ahz u kabz eyledim ba‘de’l-yevm zikr olunan menzil-i merkūm Abdülbâkī Efendi’nin mülk-i müşterâsıdır, keyfe mâ yeşâ’ ve hasbemâ yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Umdetü’l-mevâli’l-izâm Atâullâh Efendi, Karabâğī eş-Şeyh Mustafa Efendi, fahrü’l-akrân Ali Ağa, fahrü’l-akrân Şaban Ağa, imâm Ahmed Efendi b. Mehmed, müezzin Mehmed Halîfe b. İsâ, fahrü’l-kuzât Musa Efendi b. Mehmed, İbrahim Efendi b. Süleyman, Kemaleddin b. Abdülkādir, Ahmed b. Derviş, İbrahim Efendi el-Müstaid, Cafer b. Abdullah, ve gayruhüm mine’l-hâzırîn.