İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 338 Hüküm no: 325 Orijinal metin no: [84a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müstakime bt. Abdullah ile boşandığı eşi Mehmed b. Abdullah’ın birbirlerinin zimmetlerini ibrâ ettikleri Mahmiye-i İstanbul’da Manisalı Çelebi mahallesinde sâkine olup zâtı ma‘rifet-i şer‘iyye ile ârifân hâlâ zevci İbrahim Çelebi b. Bayram ve Mustafa Çelebi b. Hüsrev nâm kimesneler ta‘rîfleri ile mu‘arrefe olan Müstakime bt. Abdullah nâm hâtun meclis-i şer‘de, sâbıkan zevci olan bâ‘is-i hâze’l-vesîka Mehmed b. Abdullah nâm kimesne mahzarında ikrâr ve takrîr-i kelâm edip mezbûr Mehmed zevcem olup bundan akdem talâk-ı bâyin ile beni tatlîk etmekle zimmetinde mütekarrir ve ma‘kūdun-aleyh olan bin akçe mehr-i müeccelim ile cihet-i karzdan zimmetinde hakkım olan on bin esedî guruşu mukaddemâ kendiye def‘ ve teslîm eylediğim bir sîm ön kuşağımı ve yemenî taşlı bir sîm kuşağımı ve sâir beynimizde ma‘lûm eşyâmı mezbûr Mehmed’den da‘vâ ve taleb eylediğimde, ol dahi teslîmden imtinâ‘ ettiğinden mâ‘adâ ol dahi sâkine eşyâ-i memlûkemden iki yakası kapama ve bir entari ve bir çintiyun ve üç kelle-pûş ve bir ihrâm ve bir Dımaşkī ve setre bir çeliç? ve bir hırka ve bir don ve bir gömlek def‘ ve teslîm edip ve mukaddemâ menzilin meremmâtına emrin ile kendi malımdan dört bin beş yüz akçe harcetmiş idim deyû benden eşyâ-i merkūme ile meblağ-ı mezkûru da‘vâ ve taleb ettiğinde? beynimizde nizâ‘-ı küllî vâki‘ olmuşdum? . El-hâletü [hâzihî] mezbûr Mehmed yedinden zikr olunan sîm ön kuşağı ahz u kabz eylediğimden sonra mehr-i müeccelim olan meblağ-ı mezbûre ve eşyâ-i merkūmeye ve târih-i kitâba gelince beynimizde cereyân eden ahz ve i‘tâ ve mu‘âmelât-ı şettâya müte‘allika âmme-i de‘âvî ve mütâlebâtdan ben mezbûr Mehmed’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt edip ve mezbûr Mehmed dahi kezâlik vech-i muharrer üzre benden da‘vâ ve taleb eylediği eşyâ-i merkūmeye ve târih-i mezbûra gelince beynimizde cârî olan ahz ve i‘tâ ve mu‘âmelât-ı şettâya müte‘allika cemî‘ de‘âvî ve muhâsamâtdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa b. Şaban, İbrahim b. Bayram, Mustafa Çelebi b. Fîrûz, Mehmed Efendi b. Mehmed, İbrahim Çelebi b. Ahmed, Veli Beşe b. Mahmud, Ebûbekir b. Hüseyin, Ali Beşe b. Şaban ve gayruhüm mine’l-hâzırîn.