İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 342 Hüküm no: 327 Orijinal metin no: [85a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ramazan b. Abdurrahman’ın terekesini Hasan b. Mustafa’nın satın aldığı Mahmiye-i İstanbul’da Molla Ahî mahallesinde sâkin iken bundan akdem vefât eden Ramazan b. Abdurrahman nâm kimesnenin vasiyy-i muhtârı olan Hüseyin Efendi b. Mustafa nâm kimesne meclis-i şer‘-i şerîfde bâ‘is-i hâze’l-kitâb el-Hâc Hasan b. Mustafa nâm kimesne mahzarında ikrâr ve takrîr-i kelâm edip müteveffâ-yı mezbûrun terekesinin sûk-ı sultânîde ba‘de’l-müzâyede mezbûr el-Hâc Hasan’a bey‘ ve teslîm ol dahi iştirâ ve kabz eylediği beynimizde ma‘lûme eşyâ bahâlarından zimmetinde müctemi‘ olan beş bin beş yüz akçeyi mezbûr el-Hâc Hasan bana edâ ve teslîm ben dahi yedinden tamâmen ahz u kabz eyledim. Min ba‘d meblağ-ı mezbûr beş bin beş yüz akçeden mezbûr el-Hâc Hasan zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Rebî‘ilevvel li sene seb‘a ve semânîn ve elf. Şuhûdü’l-hâl: Yusuf Çavuş b. Abdullah, Ahmed Bey b. ( ), yorgancı Mustafa Çelebi, yorgancı Ahmed Çelebi, yorgancı Davud Çelebi, el-Hâc Ali b. ( ), Mustafa Beşe b. ( ) ve gayruhüm mine’l-hâzırîn.