İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 343 Hüküm no: 329 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Bey b. Ahmed’in Osman b. Mustafa’da olan alacağını tahsil ettiği Altmışıncı Solaklar odasına mahsûs oda yoldaşlarından bâ‘is-i hâze’l-kitâb Ömer Bey b. Ahmed nâm kimesne meclis-i şer‘-i şerîfde Osman b. Mustafa nâm kimesne mahzarında üzerine da‘vâ ve takrîr-i kelâm edip mezbûr Osman târih-i kitâbdan beş sene mukaddem yedimden iştirâ ve kabz ettiği beynimizde ma‘lûm emti‘a-i mütenevvi‘a bahâsından elli esedî guruş hakkım olmağla hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Osman cevâbında fi’l-hakīka kaziyye muharrer minvâl üzre olup müdde‘î-i mezbûr cihet-i mezbûr zimmetinde vâcibü’l-edâ ve lâzımü’l-kazâ elli esedî guruş deyni olduğunu bi tav‘ihî ikrâr ve i‘tirâf etmeğin mûcebince meblağ-ı mezbûr elli esedî guruş müdde‘î-i mezbûra edâ ve teslîme merkūm Osman’a tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Mehmed Bey b. Mehmed, Muharrem b. Şaban ve gayruhüm.