İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 346 Hüküm no: 335 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdürrezzak b. Seyyid Ömer’in Ali Bey b. Ahmed’de olan alacağını tahsil ettiği Mahmiye-i İstanbul’da Eskiodalar kurbunda Kazasker Mehmed Efendi mahallesinde sâkin Mısr[î] es-Seyyid Abdürrezzak b. es-Seyyid Ömer nâm kimesne meclis-i şer‘-i şerîfde Havâss-ı Aliyye kazâsı müzâfâtından Terkos nâhiyesinde Kulfal nâm karye ahâlîsinden Ali Bey b. Ahmed nâm kimesne mahzarında ikrâr ve takrîr-i kelâm edip bundan akdem medîne-i Edirne’de mezbûr Ali Bey yedimden iştirâ ve kabz eylediği dokuz köse? tülbent bahâlarından yetmiş guruş ve bir ceylan alacası bahâsından on beş guruş ve bir devât bahâsından otuz guruş ve bir ihrâm bahâsından sekiz guruş ve bir hünkârî tülbent bahâsından on iki guruş ve iktirâz ve kabz eylediği yüz on guruş, cem‘an mezbûr Ali Bey zimmetinde hakkım olan iki yüz kırk beş guruşu mezbûr Ali Bey’den taleb ve da‘vâ eylediğimde, beynimizde nizâ‘-ı küllî vukū‘undan sonra muslihûn tavassut edip mezbûr Ali Bey ile beynimizde kırk guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr kırk guruşu mezbûr Ali Bey yedinden ahz u kabz ettiğimden sonra husûs-ı mezbûra müte‘allika âmme-i de‘âvâdan mezbûr Ali Bey’in ve meblağ-ı mezbûre kefîl olan Kasbar ve Serkis ve Sefer nâm Ermenilerin zimmetlerini ibrâ-i âm ile ibrâ ve iskāt eyledikde dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Bey b. İbrahim, Mehmed Çavuş b. Musa, Derviş Mehmed b. Mustafa, Dilaver Bey b. Abdullah, Şâhin Bey b. Abdullah, Mehmed b. Cafer, İbrahim Çelebi b. Mehmed ve gayruhüm.