İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 347 Hüküm no: 336 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad v. Zeron’un değirmen ve sair eşyalarını Bağdasar v. Mardiros ve Arutin v. Pilibos’a sattığı Husûs-ı âti’l-beyânın mahallinde tahrîr iltimâs olunmağın savb-ı şer‘-i enverden Mevlânâ Hasan Efendi b. el-Hâc Mustafa irsâl olunup ol dahi mahmiye-i İstanbul’da Unkapanı kapısı hâricinde Loncayeri demekle ma‘rûf mevzi‘a varıp zeyl-i sahîfede muharrerü’l-esâmî olan müslimîn huzûrlarında akd-i meclis-i şer‘-i mübîn eyledikde mahmiye-i mezbûrede Kırkçeşme kurbunda vâki‘ ekmekçi fırınında ustageri olan Murad v. Zeron nâm zimmî meclis-i ma‘kūd-ı mezbûrda bâ‘is-i hâze’s-sifr Bağdasar v. Mardiros ve Arutin v. Pilibos nâm zimmîler muvâcehelerinde ikrâr ve takrîr-i kelâm edip zikri âtî akdin sudûruna değin silk-i mülkümde münselik olup fırın-ı mezkûr içinde üç sehimden iki sehim hissem olan on iki değirmen bârgir ve altı elek ve yirmi altı panakot ve dört sahan ve bir tava ve bir tencere ve bir kebe ve iki terâzi ve dört at yedekliği ve üç göğüslük ve dört kürek ve iki kalburu mezbûrân Bağdasar ile Arutin tarafından îcâb ve kabûlü hâvî bey‘-i bâtt-ı sahîh-i şer‘î ile elli bin akçeye bey‘ ve teslîm anlar dahi ber vech-i muharrer iştirâ ve kabûl ve tesellüm eylediklerinden sonra meblağ-ı mezbûr elli bin akçemi mezbûrân Bağdasar ve Arutin bana edâ ve teslîm ben dahi yedlerinden bi’t-tamâm ahz u kabz eyledim dedikde gıbbe’t-tasdîki’ş-şer‘î husûs-ı mezbûr Mevlânâ-yı mezbûr mahallinden tahrîr ve ma‘an irsâl olunan Halil Beşe b. Ali ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Veli b. el-Hâc Ramazan, Mehmed Ağa b. ( ) Kethüdâ-yı ekmekciyân, Ahmed Ağa Çavuş-ı kapan, İbrahim Bey Salcı, Seyyid Nasrullah Çelebi b. ( ) Yiğitbaşı, Ahmed Çelebi b. İdris, Markor v. Toros, Arakil v. Murad, Avram v. Serkis, Mardiros v. Avadik, Hazar v. Hayim, Mosis v. Agop, Murad v. Ovanes.