İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 347 Hüküm no: 337 Orijinal metin no: [87a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın, Yani v. Aspolto aleyhindeki alacak davasından men edildiği Mahmiye-i İstanbul’da Kızılminâre mahallesinde sâkin iken bundan akdem vefât eden Mehmed b. Yusuf nâm kimesnenin li ebeveyn ammisi oğlu olup ve hasren vârisi olan diğer Mehmed b. Hasan nâm kimesne meclis-i şer‘-i şerîfde bakkal tâ’ifesinden Yani v. Aspolto nâm zimmî muvâcehesinde üzerine da‘vâ ve takrîr-i kelâm edip mûrisim müteveffâ-yı mezbûr Mehmed hayâtında târih-i kitâbdan dört sene mukaddem mesfûr Yani’ye iki yüz esedî guruş karz ve teslîm ol dahi yedinden iktirâz ve kabz edip kable’l-ahz fevt olmağla mezbûru bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Yani’ye meblağ-ı mezbûr iki yüz esedî guruşu müteveffâ-yı mezbûrun yedinden iktirâz ve kabz etmeyip elân zimmetinde vâcibü’l-edâ ve lâzımü’l-kazâ deyni olmadığına yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsâ aleyhi’s-selâm etmeğin mûcebince müdde‘î-i mezbûr diğer Mehmed bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. el-Hâc Nurullah, İbrahim Beşe el-Mübâşir, Ahmed Çelebi b. Mehmed, Ali b. Osman ve gayruhüm.