İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 348 Hüküm no: 338 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Ahmed’in eşi Mehmed b. Yusuf’dan muhâla‘a yoluyla boşandığı Mahmiye-i İstanbul’da Akşemseddin mahallesi sâkinelerinden olup zâtı ma‘rifet-i şer‘iyye ile ârifân Osman b. el-Hâc Ömer ve İsmail b. Mustafa nâm kimesneler ta‘rîfleri ile mu‘arrefe olan Râbia bt. Ahmed nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Mehmed b. Yusuf nâm kimesne mahzarında ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun-aleyh olan mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra eşyâ-i memlûkemden bir kilim ve bir döşek ve bir yorgan ve üç yastık ve bir seccâde ve bir ihrâm ve bir minder ve bir tahta iskemle ve bir şam‘dan ve dört sahan ve bir tencere ve bir kaban ve bir yüz yastığı ve bir çarşaf ve bir sandal kaftan ve bir hâre zıbın ve bir hamam döşemesi ve bir makrama ve bir don ve bir sepet sandığını mezbûr Mehmed bana def‘ ve teslîm ben dahi yedinden tamâmen ahz u kabz edip ba‘de’l-yevm hukūk-ı zevciyyete ve eşyâ-i mezkûreye müte‘allika âmme-i de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, İsmail b. Mustafa, Mehmed b. Osman, Ahmed b. Abdullah, Ebûbekir b. Hüseyin, İbrahim b. Ahmed.