İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 351 Hüküm no: 341 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Şaban Efendi’nin dükkânları ile mahzenini eşi Süleyman Efendi b. Mehmed’e hibe ettiği Husûs-ı âti’l-beyânın mahallinde tahrîri iltimâs olunmağın şerî‘at-ı mergūbeden Mevlânâ el-Hâc Hasan Efendi irsâl olunup ol dahi mahmiye-i İstanbul’da Hasan Paşa mahallesinde sâkine fahrü’l-muhadderât Ayşe bt. Şaban Efendi nâm Hâtun’un menziline varıp zeyl-i vesîkada mastûrü’l-esâmî müslimîn huzûrunda akd-i meclis-i şer‘-i hatîr eyledikde zâtı Müezzin İbrahim Çelebi b. Mehmed ve Müezzin Mehmed Halîfe b. Rıdvan ta‘rîfleriyle mu‘arrefe olan mezbûre Ayşe Hâtun meclis-i ma‘kūd-ı mezbûrda işbu sâhibü’l-kitâb zevci fahrü’l-müderrisîn Süleyman Efendi b. Mehmed mahzarında ikrâr-ı tâm ve takrîr-i kelâm edip mahmiye-i merkūmede merhûm İlyas Bey vakfına arsasının yevmî üçer akçe mukāta‘a-i kadîmesi olup bey‘-i âtî sudûruna değin taht-ı tasarrufumda olan mahmiye-i mezbûrede Karagümrük nâm mevzi‘de vâki‘ bir tarafdan Kethüdâ Kadın vakfı ve bir tarafdan Cafer Ağa dükkânı ve iki tarafdan tarîk-i âm ile mahdûd, biri kebabçı ve biri ekmekçi ve biri kasab ve biri berber ve biri kazgancı dükkânları ki cem‘an beş bâb mülk dükkân ve bir bâb mülk mahzende olan hisse-i şâyi‘amı zevcem mezbûr Süleyman Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile nakd-i râyic fi’l-vakt otuz bin akçeye bey‘ ve teslîm ol dahi minvâl-i muharrer üzre iştirâ ve tesellüm ve kabz eyledikden sonra semeni olan meblağ-ı mezbûr otuz bin akçeyi hibetü’d-deyn mimmen aleyhi’d-deyn câiz mısdâkınca zevcim mezbûr Süleyman Efendi’ye hibe-i sahîha-i şer‘iyye ile hibe edip ol dahi meclis-i hibede ittihâb ve kabûl eyledi ba‘de’l-yevm zikr olunan beş bâb dükkân ve bir bâb mahzende olan hisse-i şâyi‘am zevcim mezbûr Süleyman Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun, vechen mine’l-vücûh sebeben mine’l-esbâb benim alâka ve medhalim kalmadı dedikde gıbbe’t-tasdîki’ş-şer‘î husûs-ı mezbûru [88b] Mevlânâ-yı mezbûr mahallinde tahrîr ve ma‘an irsâl olunan Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’l-ibtigā ketb olundu. Fi’l-yevmi’s-sâdis min Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Veli b. Nasûh, es-Seyyid Cemaleddin b. es-Seyyid Ahmed, İsmail Çelebi b. İbrahim, Ahmed Çelebi b. Yusuf el-Müezzin, Hasan Çelebi b. Hüseyin el-Kayyım, Derviş Mehmed Çelebi b. Mustafa el-Müezzin, el-Hâc Yusuf b. Âbidin terzi, Mehmed b. Abdullah.